Буудлагын спортын нэрт мастер Б.Мөнхбаяр саяхан Монгол улсын иргэншлээ сэргээх хүсэлтээ тавьсан билээ.  Энэ талаарх мэдээлэл ч олны дунд шуугиан тариад байна. Түүний хүсэлтийг Ерөнхийлөгчийн тамгын газарт хэлэлцээд дахин Монгол улсын иргэн болох үгүйг шийдэх гэнэ. Тодруулбал түүний Монголдоо ирж амьдрах үгүй нь Ерөнхийлөгч Ц.Элбэгдоржоос ихээхэн шалтгаалах юм. 

Түүнд Германаас татгалзаж Монгол улсын иргэншлээ сэргээх болсон нь хэд хэдэн шалтгаантай гэнэ. Нэгдүгээрт энэ жил 44 нас хүрч буй тамирчин бүсгүй өнгөрсөн 12 дугаар сард Германы армийн ахлах түрүүч нөхрөөсөө салж, монгол залуутай гэр бүл болсон хэмээн албан бус эх сурвалжууд мэдээлж байгаа. Дараах том  шалтгаан нь  үргэлж эх орноо санаж, бодож явдаг сэтгэл нь нь түүнийг ийм шийдвэр гаргахад нөлөөлсөн аж. 

Хэрвээ Б.Мөнхбаяр иргэншлээ сэргээн дахин Монголын иргэн болбол олимпийн наадмаас медаль хүртсэн бусад тамирчдын адил сар бүр тэтгэмж авч чадахгүй нь гэдэг мэдээлэл бас цацагдаж эхлээд байна..

Учир нь тэрээр Барселоны олимпод буудлагын 25 метрийн спорт гар бууны дасгалд Монгол Улсын нэрийн өмнөөс оролцож хүрэл медаль хүртэж байсан. Харин 2008 оны Бээжингийн Олимпод Германы нэрийн өмнөөс оролцон 25 метрийн спорт гар бууны дасгалд мөн хүрэл медаль хүртсэн. Манай улс олимпийн наадмаас хүрэл медаль авсан тамирчдадаа сар бүр 2 сая төгрөгийн тэтгэмж олгодог. Тэгэхээр хуулийн дагуу Б.Мөнхбаярт сар бүр 4 сая төгрөг өгөх ёстой байгаа ч 2 сая төгрөгийг өгөхгүй гэдэг маргаан гараад байгаа аж. Учир нь түүний олимпийн наадмаас авсан хоёр хүрэл медалийн нэг нь Германы нэрийн өмнөөс оролцож авсан шагнал учраас ингэж байгаа гэнэ.

 Тиймээс Монгол улс өөрийн орны нэрийн өмнөөс олимпод оролцож авсан хүрэл медальд л сар бүр олгодог мөнгөн тэтгэмжийг өгнө гэсэн байр суурьтай байгаа аж.

Ямартай ч энэ асуудлыг Ерөнхийлөгчийн тамгын газар дээр хэлэлцэж байгаа бөгөөд яаж шийдэгдэх нь одоогоор тодорхойгүй байна. Энэ талаар спортынхон ч нилээн маргаантай байр суурьтай байгаа гэж эх сурвалжууд хэлж байна.  Харин  арав гаруй жилийн өмнө Герман улсын иргэн болж байсан Б.Мөнхбаярт сар бүр олгодог тэтгэмжээс илүү Монголынхоо иргэншлийг сэргээх нь илүү чухал байгаа гэж спортынхон хэлж байна.