Нийслэлийн Иргэдийн төлөөлөгчдийн хурлын Тэргүүлэгчдийн ээлжит хуралдаан өчигдөр боллоо. Хуралдаанаар "Замын хөдөлгөөний төхөөрөмжөөр илрүүлсэн зөрчилд хариуцлага тооцох” журмын төсөл, Нийслэлд нэн шаардлагатай шинэ техник, технологи, Ноу Хау-г нэвтрүүлж, нутагшуулах төслийг хэрэгжүүлэх журам, Гудамж талбайн нэр өөрчлөх тухай тогтоолын төслийг тус тус танилцууллаа. “Гудамж талбайн нэр өөрчлөх тухай” тогтоолын төслийг нийслэлийн Засаг даргын Тамгын газрын дарга Ё.Гэрэлчулуун танилцуулав. Их Монгол улсаа байгуулсан эзэн богд Чингис хааны суу алдар найман зууныг өртөөлөн монгол хүн бүрийн шүтээн, бахархал, омогшил болсоор ирсэн. Тиймээс Монголын төр, түмэн эзэн богд Чингэс хаанаа дээдлэн нийслэл хотынхоо төв талбайг Эзэн богд Чингэс хааны нэрээр нэрлэхээр болсныг тэрээр дуулгасан юм. Нийслэлийн Иргэдийн Төлөөлөгчдийн Тэргүүлэгчдийн олонх нь “Сүхбаатарын талбай”-г “Чингэс хаан талбай” болгох шийдвэрийг санал нэгтэйгээр дэмжсэн байна.

Эрдэм шинжилгээ, судалгааны байгууплагууд, судлаачид, иргэд, төрийн бус байгууллагуудаас Нийслэлийн Иргэдийн Төлөөлөгчдийн хуралд Нийслэлийн төв талбайн нэрийг өөрчлөх асуудлаар удаа дараа хүсэлт тавьсны дагуу Монголчуудын сэргэн мандалт хөгжил дэвшлийн тулгуур, бидний бахархал болсон эзэн богд Чингэс хааны нэрэмжит талбай болгон өөрчлөх шийдвэр гаргасан байна. Тэгвэл Сүхбаатарын талбайг Чингэсийн болгон өөрчилсөн талаараа өнөөдөр олон нийтэд мэдээлэл хийхээр төлөвлөжээ.