Улсын Дээд Шүүхээс Хөвсгөл аймгийн Бүрэнхааны Фосфоритын ордод хууль бусаар олгогдоод байсан 8 тусгай зөвшөөрлүүдийг цуцлах шийдвэр гаргасан байна. Энэ талаар өнөөдөр хэвлэлийн хүрээлэнд мэдээлэл хийлээ.

Хүний эрх хөгжилт төвийн хэрэгжүүлж байгаа нийтийн эрх ашгийн стратегийн өмгөөллийн хүрээнд 2010 оноос эхэлсэн Хөвсгөл аймгийн Бүрэнхааны фосфоритын ордод хууль бусаар олгосон тусгай зөвшөөрлүүдийг цуцлуулах хэрэг 3 жил орчим үргэлжилснийг өнгөрсөн сарын 24-ний өдрийн Улсын дээд шүүхийн Захиргааны хэргийн тэнхимийн хуралдаанаар амжилттай шийджээ.

Хэргийн нэхэмжлэгчээр Хөвсгөл аймгийн Бүрэнтогтох сумын Туяа багийн иргэн Д.Мягмарчулуун, Ж.Базаррагчаа, О.Даваажав, Т.Даваачулуун нар тэднийг төлөөлөн ХЭХТ-ийн хуульч, өмгөөлөгч Д.Эрдэнэчимэг, Б.Батхишиг, ХЭХТ-ийн гэрээт өмгөөлөгч, Байгаль хамгаалах хуульчдын холбооны тэргүүн Ш.Жаргалсайхан, нэхэмжлэгчээр Хөвсгөл далайн экосистемийг хамгаалах чиглэлээр үйл ажиллагаа явуулдаг "Хөвсгөл далайн эзэд" ТББ түүнийг төлөөлж, тус байгууллагын тэргүүн Б.Баярмаа нар хамтран ажилажээ.

Стратегийн орд газрын жагсаалтад орсон энэхүү Бүрэнхааны фосфоритын орд орших Бүрэнтогтох сумын Туяа багийн нутагт олон зуун малчин өрх, хэдэн мянган мал бэлчээн амьжиргаагаа залгуулдаг юм.  Гэтэл Ашигт малтмалын газар хууль зөрчин "Талст маргад" ХХК-нд ашиглалтын 2, хайгуулын 6 тусгай зөвшөөрөл олгосон төдийгүй, тэдгээрийг цуцлах нөхцөл бүрдсээр байхад цуцлахгүй байсан аж.

Нутгийн иргэд "Талст маргад" ХХК-нд хууль зөрчин олгосон 11428А, 3999А тоот ашиглалтын, 12633Х, 12634Х, 12635Х, 12636Х, 12637Х, 12638Х тоот хайгуулын тусгай зөвшөөрлүүдийг цуцлахыг АМГ-т даалгах нэхэмжлэлийг шүүхэд 2011 оны 02-р сард гаргасан байна.

Улмаар анхан шатны шүүх хурал 16 орчим удаа хойшилсоор энэ оны 01 дүгээр сарын 23- ны өдөр хуралдаж "Талст маргад" ХХК-ийн ашиглалтын 2 лицензийг түдгэлзүүлж, хайгуулын 6 лицензийг цуцлахыг шаардсан нэхэмжлэлийг хэрэгсэхгүй болгох шийдвэр гаргажээ. Энэ шийдвэрийн эсрэг нэхэмжлэгчид давж заалдах гомдлыг Захиргааны хэргийн шүүхэд дахин гаргасан боловч энэ оны 4 сарын 29-нд хэлэлцээд дээрх шийдвэрийг хэвээр үлдээж, гомдлыг хангахгүй орхисон байна.

Иймээс нэхэмжлэгчид Дээд шүүхэд гомдол гаргасан аж. Тус шүүх өнгөрсөн сарын 24-ний өдөр хянан хэлэлцээд дээрх тусгай зөвшөөрлүүдийг хууль бусаар олгосныг тогтоож, нэхэмжлэлийн шаардлагыг бүрэн ханган тус зөвшөөрлүүдийг цуцлахыг АМГ-т даалгасан шийдвэр гаргажээ.

Улсын дээд шүүхийн ийм шийдвэр гаргаснаар  орон нутгийн уугуул малчин иргэдийн байгаль орчны эрхийг хамгаалсан, уламжлалт мал аж ахуйгаа эрхлэн амьжиргаагаа авч явах эрхийг баталгаажуулсан, уул уурхайн үйл ажиллагаанаас үүсэх хохирлоос урьдчилан сэргийлэх боломж олгосон, мөн уул уурхайд шахагдан нутаг усаа орхих эрсдэлийг арилгасан, Хөвсгөл далай түүний экосистемийг хамгаалсан, ашигт малтмалын газрын хууль бус үйлдлээс үүсэх, засаж болошгүй хор хөнөөлийг таслан зогсоосон үйлдэл болжээ. Иймд нутгийн иргэд болон "Хөвсгөл далайн эзэд" ТББ-ийн тэргүүн хэвлэлийн хурал хийж шүүхийн шийдвэрийг олон нийтэд дэлгэлээ.