Улсын их баяр наадмын морины уралдааны үеэр унаач хүүхэд нас барсан харамсалтай хэрэг гарсан. Энэ дагуу ХЭҮК-оос мэдэгдэл хүртэл гаргасан. Тэгвэл өнөөдөр НҮБ-ын Хүүхдийн cангаас хурдан морины унаач хүүхдийн эрхийн асуудлаар дахин мэдэгдэл гаргав.

 Мэдэгдэлд, "Үндэсний их баяр наадам дэлгэр сайхан болсон ч бага насны хүүхдээр хурдны морь унуулж, амь нас, эрүүл мэндийг нь эрсдэлд оруулж байна. Албан ёсны, нарийвчилсан тоо баримт хараахан гараагүй боловч гадаадын хэвлэл мэдээллийн байгууллагууд болон зарим эх үүсвэрийн мэдээлснээр 7 дугаар сарын 11-13-ны өдрүүдэд Хүй долоон худагт болсон хурдан морины уралдааны үеэр 24 хүүхэд гэмтэж, улмаар Төв аймгийн Жаргалант багийн өдөрлөгийн үеэр  7 настай хүү, Архангай аймгийн Өгийнуур сумын наадмын үеэр 9 настай хүү харамсалтайгаар эндсэнд НҮБ-ын Хүүхдийн сан гүнээ харамсаж, тэдний гэр бүлийнхэнд эмгэнэл илэрхийлье. Хэдийгээр хурдан морь унаач хүүхдийн насны доод хязгаар долоо байх, даатгалд заавал хамруулах асуудлыг хуульчилж,  хамгаалалтын хувцас хэрэглэлийн стандартыг  тогтоосон ч уралдааны үеэр хүүхдүүд осол гэмтэлд өртсөөр байгаа нь  сэтгэл эмзэглүүлсэн асуудал хэвээр байна. Цаашид ч орон даяар нийтдээ 47 хурдан морины уралдаан товлогдоод байна. Тиймээс хурдан морь унаач хүүхдийн эрх, аюулгүй байдлыг бүрэн хангах талаар улам их анхаарах хэрэгтэй байна. НҮБ-ын Хүүхдийн сангаас  хүүхдийг хурдны морь унуулан ашиг хонжоо, зугаа цэнгэлийн хэрэгсэл болгон ашиглах нь хүүхдээр өндөр эрсдэлтэй, тэвчишгүй хөдөлмөр эрхлүүлж, хүүхдийн эрхийг ноцтой зөрчиж байгаа болохыг холбогдох талуудад сануулж байна. Монгол Улс Хүүхдийн Эрхийн Тухай  Конвенц, хүүхдийн хөдөлмөрийн талаарх Олон Улсын Хөдөлмөрийн байгууллагын 182, 138-р конвенциуд болон олон улсын бусад гэрээнд нэгдэн орсон орны хувьд, хүүхдийн хөдөлмөрийн тэвчишгүй хэлбэрийг устгах,  хөдөлмөрийн насны доод хязгаарыг анхаарах зэргээр олон улсын гэрээний хэм хэмжээ, зарчмыг мөрдөж, хүүхдийн эрхийг бүрэн хэрэгжүүлэх шаардлагатай байна" гэжээ.