Татвар төлөгч иргэдийн мөнгийг эрх баригчид хэрхэн зарцуулж, юунд ашиглаж байгааг жирийн иргэд бид тэр бүр мэддэггүй. Мэдэх боломж ч хумигдмал. Гэтэл  иргэдийн халааснаас гарсан 17 тэрбум төгрөгийг Эрдэс баялаг эрчим хүчний яам, “Аморе интернэшл” компанитай нийлэн зүгээр л салхинд хийсгэсэн хэрэг яг энэ үед дахин сөхөгдөж эхэллээ. 

   Хоёр жилийн өмнө Д.Зоригтын тэргүүлж байсан хуучны Эрдэс баялаг эрчим хүчний яам, “Аморе интернэшл” ХХК-тай хамтран дулааны 2-р цахилгаан станцыг түшиглэн утаагүй түлшний үйлдвэр байгуулахаар болсон. Энэ үйлдвэр Улаанбаатарт нийлүүлэх нийт утаагүй түлшний 50 хувийг үйлдвэрлэх учраас хүмүүс ихээхэн анхаарал тавьж байлаа. Гэтэл тендерт ямар ч өрсөлдөгчгүйгээр ялсан гэх “Аморе” интернэшнл компани хариуцлага алдаж, агаарын бохирдлыг бууруулах ажлыг нураасан.  Уг нь тус компанийн удирдлагууд тендерт шалгарсаны дараа “Бид жилд 210 мянган тонн хагас коксжсон шахмал түлш нийлүүлэх хүчин чадалтай цогцолбор байгуулна. Энэ байдлаараа гэхэд 2011 оны сүүлээр түлшээ нөөцлөөд эхэлнэ” гэж ам өчгөө өгч байсан гэдэг. Гэтэл өнөөдөр тус үйлдвэрийг ашиглах ямар ч боломжгүй гэсэн дүгнэлтийг уул уурхайн яамнаас гаргаад байна.

  Тодруулбал Уул уурхайн яамнаас “Өмнө нь хаана ч баригдаагүй үйлдвэрийг Монгол Улсын 18,5 тэрбум төгрөгөөр туршчихсан байна. Хаана ч ийм үйлдвэр босгож байгаагүй, туршлагагүй компанитай “Эрдэс баялаг, эрчим хүчний сайд асан Д.Зоригт хамтарч ажиллах гэрээ байгуулсан байна. ТЦ-2-ыг түшиглэж баригдсан утаагүй түлшний үйлдвэрээс нэг ширхэг ч бүтээгдэхүүн гарах боломжгүй” гэсэн утгатай дүгнэлт гаргажээ. Тиймээс энэ төслийг хаах саналыг Уул уурхайн яамнаас Засгийн газрын 8-р сарын 03-ны хуралдаанд танилцуулах гэнэ.

  Тус үйлдвэрийг анхнаасаа муу материалаар буруу барьсны үр дүнд л энэ бүх асуудал үүссэн гэдэг. Арга ядаж л үйлдвэрийг барихдаа шингэн шилний үйлдвэрийг мартаж хийсэн аж. Энэ мэт хуудуутай зүйлээр дүүрэн тус үйлдвэр өнөөдөр ч хаалттай хэвээр байна. Уг нь 1,5 тэрбум төгрөгийг шийдчихвэл, шингэн шилний үйлдвэрийг бариад 210,000 тонн хагас коксжих түлш боловсруулна гэж компанийн зүгээс мэдэгдээд хөрөнгийг шийдүүлсэн мөртлөө одоо хүртэл ажиллаж эхлээгүй аж.

Гэтэл дахин коксжих түлш үйлдвэрлэх технологийг өөрчлөхөд 3,5 тэрбум төгрөг шаардлагатай байна гэж компанийн зүгээс хүсч байгаа ч Уул уурхайн яам "Энэ мөнгийг шийдэх боломжгүй" гэж хэлж байгаа юм.

Тиймээс ч уул уурхайн яам зарлага нь хэтэрсэн тус үйлдвэрийг хаах саналтай байгаа аж.  

Уг нь энэ үйлдвэр ажиллаж эхэлбэл утаагүй түлшээр 79605 айл өрхийг хангаж, агаарын бохирдлыг өмнөх жилийнхээс илүү бууруулах боломж байсан. Гэвч энэ мөрөөдөл эцэстээ замхран алга болов бололтой.  Ер нь энэ жил Цэвэр агаар сангийн ажил хэрхэн үргэлжлэх нь тодорхойгүй байна. Утаагүй түлшний үйлвэр хаалгаа барьсан байдалтай байхад “Цэвэр агаар” сангийн захирал Хүрэлсүх болон нэр бүхий хүмүүс авлигын хэрэгт шалгагдаад байгаа.

Иргэд тухайн үеийн Эрдэс баялаг, эрчим хүчний сайд Д.Зоригт, Засгийн газрын хэрэг эрхлэх газрын дарга Ч.Хүрэлбаатар нарт “Аморе интернэшнл” компанид давуу эрх олгосон гэж ихээхэн дургүйцэж байгаа юм.  Хамгийн гол нь энэ хариуцлагагүй компанийн уршгаар нийслэлчүүд бид энэ жил дахиад л хорт утаагаар амьсгалах болж байгаа юм.