НИТХ-аас “Нийслэлийн нутаг дэвсгэрт барилгын үйл ажиллагаа эрхлэхэд хөдөлмөр хамгаалал, аюулгүй байдлыг хангах нийтлэг журам”-ыг баталсан билээ. Журам гарсантай холбоотойгоор барилгын ослын тоо өмнөх жилийнхтэй харьцуулахад харьцангуй буурсан албаны хүн хэллээ. Тодруулбал, өнгөрсөн оны мөн үед хөдөлмөрийн аюулгүй байдлыг хангаагүйн улмаас барилгын 36 осол гарч, ослын улмаас 18 хүн харамсалтайгаар амь насаа алдсан бол энэ оны хагас жилийн байдлаар барилгын есөн осол гарснаас дөрвөн хүн нас баржээ. Мөн нийслэлээс барилгын зөвшөөрөл олгох ажлыг хөнгөвчлөн 21-30 хоногт багтаан шийдвэрлэдэг болсон. Оны эхний хагаст нийт 800 гаруй барилга барих, эхлүүлэхтэй холбоотой өргөдөл, санал гомдлыг хүлээн авч шийдвэрлэжээ.Г.Амаржаргал
Журамд захиалагч болон гүйцэтгэгч, ажил олгогч болон ажиллагсадын хооронд хийх хөдөлмөр хамгаалал, аюулгүй байдлыг хангах гэрээг ямар зарчмаар хэрхэн хийх, барилга угсралтын ажил хийх газар анхааруулах тэмдэг тэмдэглэгээ хийх, үйлдвэрлэлийн хашааны стандартыг тодорхой зааснаас гадна барилга угсралтын ажлын талбайн орчныг камержуулсан байх зэрэг шаардлагыг нарийн тусгасан юм.. Журмыг хэрэгжүүлэх тухай нийслэлийн Засаг даргын захирамж гарч, 6-р сараас эхлэн хүчин төгөлдөр мөрдөгдөж эхлээд байгаа юм байна. Нийслэлийн удирдлагууд зөвшөөрөлгүй эхэлсэн болон зөвшөөрлийн зөрчилтэй барилгыг цэгцлэх, хөдөлмөрийн аюулгүй байдлыг хатуу мөрдүүлэх үүднээс “Барилгын үйл ажиллагаа эрхлэхэд хөдөлмөр хамгаалал, аюулгүй байдлыг хангах нийтлэг журам”-ыг боловсруулан баталж, ослын тоог бууруулахад анхаарч ажиллаж байгаа юм. Гэсэн хэдий ч зуны амралт, баяр наадмыг далимдуулан санаатай болон санамсаргүйгээр зөвшөөрөлгүй барилгын ажил эхлүүлэх явдал гарч байгаа учраас нийслэлийн удирдлагын зөвлөлөөс зөвшөөрөлгүй барилга угсралтын ажил эхлүүлсэн, удаа дараа хууль тогтоомж, норм, дүрэм зөрчсөн иргэн, аж ахуйн нэгж байгууллагуудад хариуцлага тооцох, эрх зүйн зөрчлөөс урьдчилан сэргийлэх эрх бүхий “Ажлын хэсэг”-ийг байгуулжээ. Ажлын хэсгийг нийслэлийн Засаг даргын Хот байгуулалт хөрөнгө оруулалтын асуудал хариуцсан орлогч С.Очирбат ахалж байгаа юм.
