Энэ жилийн зам засварын ажил төлөвлөгөөний дагуу явагдаж, ихэнхи замууд хугацаандаа зарим нэг нь бүр хугацаанаасаа өмнө ашиглалтад орохоор байгааг Нийслэлийн авто замын газраас мэдээлсэн. Энэ нь нэг талаар удаан хугацаанд замыг хааж иргэдийг бухимдуулахгүй сайн талтай ч нөгөө талаар замын чанарын асуудлыг орхигдуулах сөрөг талтай. Өнгөрсөн жил ашиглалтанд орсон замуудаас эвдрэл гэмтэл учирсан тохиолдол ч цөөнгүй байгаа.

Тиймээс шинээр баригдаж байгаа эдгээр замуудын чанарын асуудалд хэрхэн хяналт тавьж байгааг бид НАЗГ-ын дарга Д.Нанзаддоржоос асуухад тэрээр “Чанарын асуудал бол үнэхээр чухал. Манайх замын компаниудтай гэрээ хийхдээ үүнийг хатуу заасан байгаа. Жишээлбэл тухайн замын ажлыг гүйцэтгэж байгаа компани хоёр жилийн хугацаанд технологийн алдаанаас гарсан эвдрэлийг өөрийн хөрөнгөөр засна гэж заасан. Өөр янз бүрийн шалтгаанаар тухайлбал хүнд даацын автомашин явсан, ухаж төнхсөн зэрэг бусад гадны нөлөөллөөс үүдсэн эвдрэл гэмтлийг хохирол учруулсан этгээдээр засч янзлуулах арга хэмжээ авна. Ер нь замын чанар дээр анхаарч, чанарыг дээшлүүлэх арга хэмжээнүүдийг авч ажиллаж байгаа. Одоо баригдаж байгаа замуудаас нэг хоёр жилдээ нүх гараад эвдрээд байхаар зам гарахгүй байх гэж найдаж байна. Эдгээр замуудад хяналт хийх лаборатор ажиллаж байгаа. Зарим томоохон замууд дээр зөвлөх үйлчилгээ гээд мэргэжлийн хяналтын компаниудыг ажиллаж байна. Мөн материалын чанарын асуудалд ихээхэн анхаарч байна” гэлээ.