Хэдхэн сарын өмнө Дорноговь аймгийн Улаанбадрах суманд уран олборлосноос болж хоёр толгойтой хурга, эрүүгүй ишиг, сохор ботго, явж чадахгүй төл гарч байгаа талаарх мэдээ олныг сэртхийлгэж байсан. Цаашлаад  тус суманд мал үрэгдэх, малчдын эрүүл мэнд доройтох, байгаль орчин бохирдох сүйдэх зэргээр төрөл бүрийн хохирол гарч байсан юм. Одоо ч гарч байгаа. Малчид энэ бүх хохирлыг нутагт нь үйл ажиллагаа явуулдаг Францын "Арева" группийн охин компани “Кожеговь”-той холбон тайлбарлаж байгаа юм. “Тус компани 10 жил уран олборлосноос болж энэ бүх хохирол гарч, бид айдас хүйдэс дунд амьдарч  байна” хэмээн малчид учирлаж байсан билээ.

Ураны хор хөнөөлд автсан малын эздүүд санаа нэгдэн эсэргүүцэж 319 өрхийн гомдлыг цуглуулж төрийн гурван өндөрлөгт өргөх бичиг барьж  байсан. Тэнд зөвхөн малчин Норсүрэнгийн өрхөд бус, бусад өрх айл бүрт ураны хайгуултай холбоотой хохирол гарч  зарим айлд 30 гаруй мал хорогдсон юм. Тус суманд Д.Норовсүрэнгийн арван үхрээс гадна, 3 багийн иргэдийн нийт 1000 гаруй мал учир битүүлгээр үрэгдсэн.  Мөн  2010 оны 12 дугаар сараас 2011 оны тавдугаар сар хүртэлх хугацаанд  туршилтын олборлолт явуулснаас хойш 21 айл өрхөд гажигтай төл гарч, мал зүй бусаар хоргодсон байсан юм.  

  Гэсэн ч  Улаанбадрах сумын малчид энэхүү хүнд бэрх байдлыг эс хүлцэн, ураны хайгуулыг цуцлан зогсоож өгөөч гэж удаа дараалан зохих байгууллагуудад хандсан ч шийдвэр бүр "Кожегоби" компанийн талд гарч байсан.  Бүр Ерөнхий сайд Н.Алтанхуягийн захирамжаар Дорноговь аймгийн хэд хэдэн суманд 14 мэргэжлийн байгууллагын хамтарсан  шалгалт, шинжилгээ хийхэд мөн л ураны нөлөөллөөс болоогүй байна гэсэн хариу гарсан юм.

Тус компани нь саяханыг хүртэл ураны олборлолт, хайгуулаа Дорноговь аймагт үргэлжлүүлэн хийж байсан билээ.

Тэгвэл нутгийн малчид шударга шаардлагаа үргэлжлүүлэн тавьж, тууштай тэмцсэний хүчинд "Кожегоби" компанийн үйл ажиллагааг түрдээ зогсоож чадсан байна. 

Тодруулбал Улаанбадрах сумын малчид, Гал үндэстэн холбооныхон нийлж цөмийн эсрэг шийдэмгий тэмцлийг өрнүүлжээ. Тэд  дөрвөн машин, 10 мотоцикль болон тэмээгээ унаж очиж өрөмдлөг хийгдэж буй цэгийг бүслэн хаасан байна. Үүний үр дүнд "Кожегоби" компанийхан өрөмдлөгөө түр зогсоож өрөмдлөгийн техникээ буулгаж, кемпээ татжээ. Ингэснээр Кожеговь компани  энэ жилдээ л  ураны өрөмдлөг хайгуулаа хийж чадахгүй болж байгаа аж. Энэ бол цөмийн эсрэг үзэлтэн, малчид, идэвхтнүүдийн хавар, зуны хичээл зүтгэлийн үр дүн юм. Тэмцэл үүгээр зогсохгүй нь мэдээж, Арева компанийг Монголоос бүрэн гаргахын төлөө тэд тэмцэнэ гэдгээ мэдэгдлээ. Хэрвээ тус компанийн үйл ажиллагааг зогсоогоогүй бол Хонгор сумын түүх дахин давтагдах байсан гэдгийг ч малчид хэлж байгаа юм.

Энэ сарын 31-нд нутгийн малчидтай "Кожегоби" компанийн удирдлагууд болоод аймгийн удирдлага уулзах аж. Мөн УИХ-ын Байгаль орчин, хүнс хөдөө аж ахуйн байнгын хорооноос тус суманд хараат бус хяналтын шинжилгээ хийх гэж буйгаа өчигдөр мэдэгдлээ.

Ийнхүү улс төр, бизнесээс хальж олон улсын анхаарлыг татаж байсан Улаанбадрахын асуудал түрдээ намжлаа.