Өнөөдөр манай улсад Атомын цахилгаан станц барих зайлшгүй шаардлага байгаа тухай  Цөмийн энергийн газрын хэвлэлийн төлөөлөгч Д.Жаргалсайхан сэтгүүлчдэд мэдээлэл хийлээ. Тэрбээр  сүүлийн дөрвөн сарын турш цөмийн энергийн газарт ажиллахдаа олж авсан мэдээллүүд дээрээ үндэслэн ийнхүү мэдээлэл хийж байгаагаа хурлын эхэнд хэлэв.

Цөмийн хор хөнөөлийг бие, сэтгэлээрээ амссан Японы ард түмэн атомын цахилгаан станцаас татгалзахгүй байна. Тэд одоо  хоёр атомын станц барихаар төлөвлөсөн байна.  Тиймээс өнөөгийн дэлхий нийт  атомын цахилгаан станцыг асар өндөр технологиор хамгаалж чадах түвшинд хүрсэн гэдгийг тэрээр судалгааныхаа явцад олж мэджээ.

Д.Жаргалсайхан хэлэхдээ  “Олон улсын атомын энергийн агентлагаас Дулааны цахилгаан станцыг зогсоох,  шинээр барьж байгуулахгүй байхыг уриалсан. Хэрэв татгалзах аргагүй шалтгаантай бол “нүүрс хүчлийн хий-СО2”-ийг барих ба хадгалах-ССS” технологийг заавал хэрэгжүүлэхийг бүх улс орнуудаас шаардаж 2050 он гэхэд хүлэмжийн хийг 50 хувиар багасгахыг уриалсан. Дээрхи технологийг хэрэглэвэл эрчим хүчний үнэ 1 квт тутамд 87 төгрөгөөр нэмэгдэх тооцоо гарсан. Манай улсын эрчим хүчний хэрэглээ жилээс жилд өсөн нэмэгдэж байгаа. Өнгөрсөн өвөл л гэхэд одоо байгаа хүчин чадлаасаа хэтрэн  870 МВт хүрч ОХУ-аас өндөр үнээр эрчим хүч авч байсан. Энэ тоо 10 жилийн дараа 4000 МВт хүрэх тооцоотой байна. Гэтэл энэ их эрчим хүчийг яаж бий болгох асуудлаа одоо хүртэл шийдээгүй байна. Дулааны цахилгаан станцын нэг сая тонн нүүрсээр гаргах эрчим хүчийг нэг килограмм ураанаар гаргана. Мөн атомын цахилгаан станц хамгийн хямд цахилгаан гаргахаас гадна ашиглалтын зардал нь Дулааны цахилгаан станцаас 3-4 дахин бага олон дэд бүтэцгүй хүлэмжийн хий ялгаруулдаггүй байгальд ээлтэй гээд давуу тал ихтэй” гэв.

Хэвлэлийн хурлын үеэр тэрбээр атомын цахилгаан станцуудыг олноор нь барьж байгуулсан дэлхийн улс орнуудаас жишээ дурьдсан юм. Тухайлбал, БНХАУ-д цөмийн эрчим хүчний реактор 26 барьж байгаа ба 74-ийг барихаар төлөвлөжээ. Харин Энэтхэгт  өдгөө долоог барьж байгаа бол 56 атомын цахилгаан станц нэмж  барьж байгуулахаар төлөвлөөд байгаа аж.

Түүнчлэн "Манай улсад атомын цахилгаан станц барихыг эсэргүүцэж байгаа явдлыг  “Фукушима, Чернобил гэдэг том аймшигийн хар мангасаар монголчуудыг бүхэлд нь айлгаад, монголыг эдийн засгийн дарамтанд оруулж түүгээрээ далимдуулан манай улсын эд баялагийг цөмлөн авах харийн бодлого манайд хүчтэй явагдаж байна. Тийм учраас би “шар нунтаг” гаргахыг ч эсэргүүцэж байгаа. Атомын цахилгаан станц барихгүй юм бол шар нунтаг гаргаад яах юм. Манайхан бол зарж идэхээ л бодож байна. Айлаар бол ор хөнжил авдар сав гээд бүх эд хогшлоо зарж идчихээд үр хүүхдэдээ хоосон гэр үлдээх гээд байна. Харин одоо Монголчууд сэрэх цаг болсон” гэсэн юм.