Долоон буудал, Чингэлтэй, Бэлх болон хойд чиглэлийн зуслангийн 30 мянга орчим айл, өрхийг цахилгаанаар хангадаг Хайлааст 110 дэд станц нь саяхныг хүртэл аваарын байдалтай байсан билээ.

Намган дунд барьснаас үүдэлтэйгээр тулгуур баганууд нь хазайж нурж унахдаа тулаад байсан тус станцыг энэ сарын эхээр засч эхэлсэн. Тэгвэл засварын ажлын явцыг шалгахаар өнөөдөр төрийн өмчийн хорооны дарга Д.Цогтбаатар тэргүүтэй албаныхан газар дээр нь очиж ажиллалаа. 2009 онд ашиглалтанд орсон “Хайлааст дэд станц” нь ашиглалтанд ороод жил хүрэлгүй эвдэрч эхэлжээ. Сүүлийн жилүүдэд нийслэлийг утаагүйжүүлэх төсөл хэрэгжиж, айл өрхүүд цахилгаанаар гэр, байшингаа халаах болсноор бүр ч ачааллаа дийлэхгүйд хүрээд байсан юм. Түүнчлэн хэзээ мөдхөн нурж унах нөхцөл байдалд байгаа 16 МВТ хүчин чадал бүхий хоёр трансформаторийн суурь нь эвдэрч эхэлсэн учраас яаралтай арга хэмжээ авч засварт оруулсан нь энэ юм.  “Цахилгаан дамжуулах үндэсний сүлжээ” төрийн өмчит хувьцаат компаниас энэ станцын трансформаторуудыг хөрсний ус ихтэй газраас нь нүүлгэн шилжүүлэхээс гадна өөр бусад засварын ажлуудыг хийж байна. Ингэж завсарласнаар Бэлх, Сэлх Дарь эх, Хайлааст зэрэг Улаанбаатар хотын хойд чиглэлийн  30 гаруй мянган айл өрхийн эрчим хүчний хэрэглээний ачаалал хөнгөрч, хэвийн ажиллах боломжтой болж байгаа юм.

Трансформаторуудыг зөөх ажил өнөөдөр эхэлсэнтэй  холбогдуулан үүрийн 03.00 цагаас эхлэн Сүхбаатар дүүргийн 11-20 дугаар хороо, Чингэлтэй дүүргийн 11-19 дүгээр хороо буюу Дарь эх, Долоон буудал, Сэлбэ, Дамбадаржаа, Яргайт чиглэл, Баянзүрх дүүргийн 2, 21 дүгээр хорооны нийт 45680 хэрэглэгчдийн цахилгааныг хязгаарлаад байна. Одоогийн байдлаар нүүлгэн шилжүүлэлтийн ажлын явц 70 хувьтай байгаа бөгөөд маргааш оройн 00.00 цагт дуусч айлууд гэрэл цахилгаанаа ямар нэгэн сааталгүй хүлээн авна.

Төрийн өмчийн байнгын хорооны дарга Д.Цогтбаатар засварын ажлын явцын талаар ярихдаа “Төрийн өмчийн хорооноос цахилгаан дамжуулалт, эрчим хүчний хангалтын асуудалд онцгой анхаарал хандуулж байна. Учир нь сүүлийн жилүүдэд хотын зүүн, баруун болон хойд хэсгүүдийн хэрэглэгчид нэмэгдэж станциуд ихээхэн ачаалалтай ажиллахад хүрсэн. Иймээс нэмэлт хүчдэл бий болгох, бүтээн байгуулалт хийх, шилжүүлэх ажлуудыг хийх нь зайлшгүй асуудал болоод байна. Энэ засварын ажил үндсэндээ ирэх сарын 25-нд дуусна. Өнөөдөр хүчдэлийг тасалж шилжүүлэх ажил явагдаж байна. Энэ ажил хоёр хоногт хийгдэх ажил юм. Өөрөөр хэлбэл маргааш  00 цагт дуусна. Үүнийг хийхэд инженер техникийн ажилчид Цахилгаан дамжуулах үндэсний сүлжээний хамт олон маш шуурхай ажиллаж байна. 110-ын шугамаа өргөтгөх мөн шинэ технологийг нэвтрүүлэх ажлыг хийж байгаа нь сайшаалтай байна. Тийм учраас бид цаашдаа шинэ технологийг нэвтрүүлэх хэрэглэгчдийг байнгын эх үүсвэрээр хангах таслахгүй байх тал дээр онцгой анхаарч ажиллана. Тиймээс хэрэглэгчид та бүхнийг тэвчээртэй байхыг хүсье. Энэ ажил амжилттай дуусна гэдэгт бид бүрэн итгэлтэй байна” гэсэн юм.  

Ийнхүү өнгөрсөн өвлийг хүндхэн давсан “Хайлааст дэд станц” ирэх өвлийг асуудалгүй өнгөрөөх бололтой.