Олон хүнд гай болж, олон банкны “толгойг залгисан” гэх Олон овоотын асуудал ойрд шуугиан тарьж байна. Хамгийн сүүлд “Жаст”-ын Г.Батхүүг дампууруулж, “Хадгаламж” банкны амийг барьсан энэ ордтой холбоотой бас нэгэн мэдээлэл бидэнд ирлээ.

“Жаст”-ын Г.Батхүү өөрийн дампуурлаа Ц.Мянганбаяртай холбон тайлбарлаж, хулхидуулсан гэж зарласан тэр өдрөөс хойш “Олон овоот” компани ажилчдаа олноор нь цомхтгож эхэлсэн байна. Өнгөрсөн оны аравдугаар сараас хойш үйл ажиллагаагаа зогсоогоод байсан тус уурхайд инженер болон бусад гол ажлыг нугалдаг хүмүүс нь л үлдсэн гэнэ. Харин бусад ажилчдаа бүгдийг нь халжээ. 

“Жаст” групп дампуурлаа зарласантай холбоотойгоор дээрх уурхайд 50 хувийн хөрөнгө оруулсан “Алтжин” группийн Г.Алтан ч өөрийн хөрөнгөө татсан байна. Үүнээс болж 500 орчим хүн ажлаасаа халагдаж гудамжинд гарч байгаа юм байна.

Ингэхээр Г.Алтан хатагтай цаашид "Олон овоот"-той ямар ч холбоогүй болж байна гэсэн үг аж.

Монгол Улсын эрдэс баялгийн санд бүртгүүлж, гадны экспертүүдээр тодорхойлуулснаар 18.5 тонн алтны нөөцтэй гэсэн тус орд нь хачир дээрээ 4 тонн алттай байсан гэж “Жаст”-ын Г.Батхүү хэлсэн. Тэгэхээр Г.Алтан хатагтай "Зоос", "Анод", "Жаст" шиг модоо барихгүйн тулд эртхэн  "Олон овоот"-оос татгалзсан нь энэ биз.

 Харин хүмүүс Г.Алтан хатагтайн гарт очсон “Олон  овоот”-ын хувь заяа хэрхэх бол гэсэн асуултын хариу ийм хурдан гарна гэж төсөөлөөгүй хэмээн ярьж байна.

“Олон овоот”-ын арилжааны банк  болон банк санхүүгийн  байгууллагуудын дундын  өр, иргэн, аж ахуйн нэгж, татварын өртэйгөө  нийлээд 300 тэрбум  төгрөг гэж тооцож буй гэнэ. Тэгэхээр санхүүгийн хувьд  муугаас ч муу түүхтэй “Олон овоот гоулд”-ыг цаашид хэрхэх нь тодорхойгүй байна. Ер нь "Олон овоот" ч гэлтгүй манай бүх уул уурхайн компаниуд ажилчдаа цомхтгож эхэлж байна. "Хүннү Кoaл”, ”MCS”, ”МАK” гээд цөөнгүй компани шинээр эхлүүлэх гэж байсан төслүүдээ зогсоож, ажилчдаа цалингүй амралт өгөөд явуулжээ. Энэ нь эдийн засагт аюул нүүрлэж байгаа эхний дохио гэдгийг мэргэжлийн хүмүүс хэлж байгаа юм.

Уул уурхайн ажил цалин сайтай, ирээдүйтэй гэж хошуурч байсан хүмүүсийн дийлэнхи нь эхнээсээ ажилгүй болж гудамжинд "лааз өшиглөхдөө" тулаад буй нь энэ салбарын байдал хүндхэн болоод байгаагийн илрэл юм.