Үйлдвэр хөдөө аж ахуйн яамнаас мэдээлэл хийлээ. Хүнсний аюулгүй байдалтай холбоотой ноцтой асуудал гарсан байна. Тодруулбал Шинэ Зеланд улсын Фонтеррад гэсэн үйлдвэрээс манай улс хуурай сүүнийхээ 90 орчим хувийг авдаг. Гэтэл энэ үйлдвэрийн бүтээгдэхүүнээс “Clostridium Botulinum” гэсэн маш хортой нянгийн бохирдол илэрсэн байна.

 Нянгийн бохирдол илэрсэн бүтээгдэхүүнийг хатаасан шар сүүний уургийн бэлдмэлээр хийдэг байна. Шар сүүний уураг нь 0-3 насны хүүхдийн хуурай сүүн тэжээлийн суурь болдог бүтээгдэхүүн аж. Шар сүүний уургийн бэлдмэлээс илэрсэн энэ бохирдол нь одоогийн байдлаар нийт дөрвөн компаниас илрээд байгаа бөгөөд дээрх компаниуд зах зээлээс бүтээгдэхүүнээ татаж эхэлжээ. Фонтерра компанийн хүүхдийн сүүн тэжээл бэлтгэдэг компанийн нэрийг дурдвал, БНХАУ-ын Dumex Baby, Wahaha хүнсний үйлдвэр, АНУ-ын Окланд мужийн Vitaco Healt групп, БНХАУ дахь Coco-Cola болон Frances Danone компанийн салбар үйлдвэрүүд, Шинэ Зеландын NZAgbiz малын тэжээлийн үйлдвэр зэрэг юм. .

Тус компанийн яг ямар нэртэй бүтээгдэхүүнээдээс нь нян илэрсэн талаарх мэдээлэл одоохондоо албаныханд байхгүй байгаа аж.

Энэ асуудалтай холбоотойгоор дэлхий нийт сүүлийн хоёр өдрийн турш нилээн шуугиж мөн болгоомжилж байгаа гэнэ. 

Үүнд үндэслээд Үйлдвэр хөдөө аж ахуйн яамнаас мэргэжлийн хяналтын газар, Гаалийн ерөнхий газар, Эрүүл мэндийн яаманд албан тоот хүргүүлж, холбогдох арга хэмжээ авах чиглэлийг өгчээ.

Хүнсний бүтээгдэхүүний аюулгүй байдлыг хангах хуулинд зааснаар эрсдэл гарсан тохиолдолд МХЕГ-аас эрсдэлийн үнэлгээг яаралтай хийж,  үнэлгээндээ тулгуурлаж тухайн бүтээгдэхүүнийг зах зээлээс эргүүлэн татах арга хэмжээг авч хэрэгжүүлэх ёстой аж. Тэгэхээр өнөөдөр мэргэжлийн байгууллагууд албан тоотоо аваад холбогдох арга хэмжээг шуурхай авч хэрэгжүүлэх юм байна.

Монгол улсын хэмжээнд 2012 оны байдлаар 4.7 мянган тонн хуурайг сүүг импортоор оруулж ирсэн аж. Харин хуурай сүүний 90 орчим хувийг Шинэ-Зеланд улсын Фонтерро үйлдвэрээс оруулж иржээ. Тиймээс манайд орж ирсэн сүүн бүтээгдэхүүнээс нян илэрснийг мэргэжлийн хяналтын газрын дүгнэлтээр тодорхойлох юм.

Цаашлаад хүүхдийн сүүн тэжээл, өндөр хэмд ариутгасан ундны сүү, йогурт, тамирчдад зориулсан уургийн бэлдмэлд ч нян байх магадалтай аж.

Ботулизм гэх энэ нян нь хүний мэдрэлийн системд нөлөөлж, булчин саажуулан улмаар амьсгал боосноор хүний эрүүл мэндэд асар муу нөлөө үзүүлдэг, үхлийн тохиолдол өндөртэй өвчин аж. Ботулизм нянгаар бохирдсон хүнсийг хэрэглэснээс хойш 18-36 цагийн дараа нүд бүрэлзэх, хэл яриа гацах, залгих боломжгүй байх, булчин сулрах зэргэ эхний шинж тэмдгүүд илэрч эхэлдэг байна.

Эрсдэлийн үнэлгээ гарсаны дараа яг ямар бүтээгдэхүүн орж ирснийг эргэн мэдээлхээ үйлдвэр худалдаа хөгжлийн яамнаас мэдэгдэв. Мөн иргэдийг сүүн бүтээгдэхүүний хэрэглээндээ анхааралтай хандахыг санууллаа.