Шинээр батлагдсан сурагчдын дүрэмт хувцасны үнэ хэт өндөр байгаа нь иргэдийн дургүйцлийг ихээр төрүүлж байна. Өнөөдөр Эцэг эхчүүдийн түр хорооноос дүрэмт хувцсны үнийг эсэргүүцэж байгаагаа илэрхийллээ. Тэд энэ талаар “Шинэ дүрэмт хувцас хэт өндөр үнэтэй. Энэ нь олон хүүхэдтэй нэн ядуу, орлого багатай айлуудад маш том дарамт болж байна. Үүнээс гадна дүрэмт хувцсаа эцэг эхчүүдэд танилцуулж ямар нэг санал асуулга явуулалгүй ийм шийдвэр гаргасан. Тиймээс бид өнөөдөр БШУЯ болон ҮХЯ-нд шаардлага хүргүүлнэ” гэсэн юм.

Мөн тэд дүрэмт хувцасны мөнгийг багш нар хурааж байгаа нь багш сурагчдын хоорондын харилцаанд сэв суух, хичээлийн цагаас мөнгө хураахад цаг зарчуулах, цаашлаад тухайн сурагчын гэрт хагарал үүсч болзошгүй гэдгийг хэлээд эцэг эхчүүдэд хандаж “Хэт үнэтэй дүрэмт хувцас авах хэрэггүй” хэмээн уриалж байлаа. 

Эцэг эхчүүд дүрэмт хувцасны үнийн талаар доорх тайлбарыг хийлээ.

Хан-Уул дүүргийн 8 дугаар хорооны иргэн Ж.Жаргалсайхан

-Хамгийн гол нь энэ дүрэмт хувцсыг эцэг эхчүүдэд танилцуулаагүй. Ямар ч байсан шинэ дүрэмт хувцастай болно л гэсэн. Тэгээд үнэ нь хэт өндөр. Өнөөдөр хамгийн багадаа нэг хоёр, түүнээс дээш тав зургаан хүүхэд нь сургуульд сурдаг айлууд бас нэн ядуу айлууд олон байгаа. Тэр айлууд энэ дүрэмт хувцсыг худалдан авч чадахгүй гэдгээ хэлж байна.

Хан-Уул дүүргийн иргэн наймдугаар хорооны иргэн Б.Цэцэг

-Би нэг ач, нэг зээтэй. Хоёулаа над дээр байдаг. Нэг нь 5 дугаар анги, нөгөө нь 10 дугаар анги. Бас нэг оюутан хүүхэдтэй. Би өөрөө тэтгэвэрийн хүн. Хэрэв хоёр хүүхдэдээ шинэ дүрэмт хувцас авбал 300-гаад мянган төгрөгөөр авна. Энэ надад маш хүнд тусах нь ойлгомжтой.