ҮХААЯ-ны Төрийн нарийн бичгийн дарга Х.Золжаргал өнөөдөр сурагчын дүрэмт хувцас оёж байгаа зарим үйлдвэрүүдийн үйл ажиллагаатай танилцлаа. Бид энэ үеэр толгой долоон компаний нэг “Өүлэн менч” ХХК-ийн Ерөнхий захирал Ч.Буянбаатараас зарим зүйлийг тодрууллаа. Энэ компани дангаараа сурагчдын дүрэмт хувцасны сорочкин цамцыг 100 хувь нийлүүлж байгаа бөгөөд хариуцсан хэсэгтээ дүрэмт хувцас нийлүүлэхээр эсгүүрийн ажилдаа оржээ. 

- Сурагчын дүрэмт хувцас үйлдвэрлэх ажлын явц танай компанийн хувьд ямар байна?

-Ерөнхий боловсролын сургуулийн сурагчдын дүрэмт хувцсыг монгол улсдаа оёдог болоход төр засгаас дэмжлэг үзүүлж байгаад бид баяртай байгаа. Энэ их итгэлийг алдахгүйн төлөө бид цаг алдалгүй ажиллаж байна. Ажлаа эхлүүлэхийн өмнө даавуу болон туслах материал татахад нэлээн хугацаан алдсан. Гэхдээ бид өөрсдийнхөө боломжийн хэрээр ажиллаж байгаа. Үйлдвэрлэлийнхээ хүчин чадлыг ч нэмэгдүүлж байна. Үндсэндээ ажлын явц жигдэрсэн. Иймд энэ сарын 25 гэхэд 1-3 ангийн хүүхдүүдийн дүрэмт хувцас болон цамцыг хугацаанд нь нийлүүлнэ.

-Танай үйлдвэр нийт хичнээн дүрэмт хувцас нийлүүлэх гэрээтэй ажиллаж байна вэ?

-Ерөнхийдөө БШУЯ-наас 450 мянган дүрэмт хувцас оёх захиалга өгөөд байгаагийн тавны нэг хэсгийг нь манай компани олон туслан гүйцэтгэгч компаниудынхаа хамтаар оёх эрхийг аваад байна. Манайх Сонгинохайрхан Сүхбаатар гэсэн хоёр дүүрэг, Өмнөговь Дорноговь Дундговь Архангай Завхан гэсэн таван аймагт дүрэмт хувцас нийлүүлнэ.

-Ямар нэгэн хүнрдэл бэрхшээл гарч байна уу?

- Бидний энэ ажилтай зэрэгцээд валютын ханш өсч байгаа. Энэ нь ихээхэн алдагдал авчрах хандлагатай байна. Жишээлбэл энэ хувцсыг анх оёж эхлэхэд хийж байсан төсөл маань тухайн үеийн ханш нэг юан нь 210 төгрөгтэй тэнцэж байхад хийгдсэн. Гэтэл яг өнөөдрийн байдлаар 279 төгрөг болчихлоо. Энэ хооронд маш их зөрүү гарч байгаа. Гэлээ ч үйлдвэрлэгч бидний хувьд үүнийг зохицуулахаар даавуу үйлдвэрлэгч компаниудтайгаа ярьж тохирч байгаа. Дээр нь манай ажилчид ч гэсэн энэ ажилд их зүтгэл гаргаж байгааг хэлэх нь зүйтэй болов уу. 

-Нэг цамцыг хэдэн мянган төгрөгөөр борлуулах вэ?

1-3 дугаар ангийн эрэгтэй, эмэгтэй хүүхдийн сорочкин цамц 9000 төгрөгний үнэтэй байгаа. Ямар ч байсан үнээрээ борлуулагдана.