Гоо сайхны олимп гэгддэг “Дэлхийн мисс”-ийн тэмцээн болоход сар гаруйн хугацаа үлдлээ. Ирэх сарын 22-нд Индонез улсад зохиогдох тус тэмцээнд дэлхийн ихэнхи орнууд оролцогчоо шалгаруулчихсан, өрсөлдөхөд бэлэн болжээ.

Харин тус тэмцээнд манай улсаас С.Пагмадулам гэх 22 настай бүсгүй оролцох болсныг өчигдөр хэвлэлээр зарлалаа. С.Пагмадуламын хувьд царай, зүс, бие хаагаараа бусад орны миссүүдээс дутаад байх зүйл үгүй. Харин тэмцээний бэлтгэл дутуу байгаа гэдгийг хэн хүнгүй хэлнэ биз.

Орон орны сайхан бүсгүйчүүд чуулж, авъяас чадвар, гоо үзэсгэлэнгээрээ өрсөлдөж шилдгээ тодруулдаг тус наадам нь тухайн улс орны нэр хүнд, нүүр царайг бас илтгэдэг. Тиймээс л гадны орнууд “Дэлхийн мисс”-ийн тэмцээнд ихээхэн ач холбогдол өгч, жилийн өмнөөс оролцогчоо шалгаруулан бэлдэж эхэлдэг аж.  Одоогоор Америк, Энэтхэг, Унгар, Англи, Франц, Итали, Хятад, Япон, Солонгос зэрэг 124 орон 2013 оны миссийн тэмцээнээ зохиож ялагчаа тодруулаад байна.

Ер нь бусад улс орнууд шинэ он гармагц л миссийн тэмцээндээ санаа тавьж, "Дэлхийн мисс"-ийн оролцогчоо эртнээс бэлдэж эхэлдэг байна. Харин манай улсад "Монголын сайхан бүсгүй", "Оюутан мисс" зэрэг олон тэмцээн болдог ч түүгээр шүүгдэж, шигшигдсэн бүсгүй энэ тэмцээнд явж чадахгүй байгаа нь нэгт, зохион байгуулалт муугийнх, хоёрт, сэтгэл гаргахгүй байгаагийнх. Зөвхөн анкетаар, цөөн хэдэн хүний үнэлэмжээр сонгох биш бусад орон шиг улсын хэмжээнд тэмцээнээ зохиох хэрэгтэй байна.

  Энэ хэдэн хувийн байгууллагууд нь хоорондоо таарч, тохирохгүй бол "Батаар"-ыг авчирсан Ц.Оюунгэрэл сайд өөрөө зохион байгуулахад ч гэмгүй. Олны нүдэн дээр ил, тод шалгаруулдаггүй, "Дэлхийн мисс"-д явна гэсэн зарын хамт оролцогчтойгоо танилцдаг байж болмооргүй байна. Дараа жилийн наадам ойрхон гэдэг шиг энэ жилийн "Дэлхийн мисс"-ийн тэмцээн удахгүй болох нь.

Өмнөх жилд дэлхийн миссийн тэмцээнд улс орноо төлөөлөн оролцсон Х.Баярмаа л гэхэд долоо хонгийн өмнө тэмцээнд оролцохоо мэдэж хувцсаа хам, хум бэлдэж аваад л явсан гэдэг. Х.Баярмаа "Дэлхийн мисс" тэмцээнд оролцох болсноо наадмын өмнө гэнэт мэдээд, ганцхан долоо хоног бэлдээд л тэмцээн болох Ордос руу явж байсан. Өөрөөр хэлбэл бусад орон шиг гоо бүсгүйчүүдээ тайзан дээр зогсоож, гадаад төрхөөс нь гадна биеэ авч явах байдал, авъяас, харилцааны соёлыг нь харах зэрэг наад захын шалгууруудыг энд авч хэрэгсээгүй гэсэн үг.

  Долоохон хоногийн хугацаанд зөвхөн хувцас, зардлаа бэлдэж амжсан Х.Баярмаа дэлхийн хэмжээний тайзан дээр үзүүлэх монгол бүжгээ өөрөө дэгэлсэн гэх. Мөн олон орны миссийн дунд нэр нүүрээ бодож аав, ээжээсээ нэлээн хэдэн төгрөг зулгааж тайзан дээр өмсөх хувцсаа бэлдэж байсан. Өндөр амжилт гаргаж чадаагүй ч Х.Баярмаа загварын алхаа, авъяаслаг миссийн тэмцээнд амжилттай оролцон монголчуудын нүүрийг улайлгаагүй ирсэн. Гэхдээ түүнд нэг долоо хоног биш нэлээн хэдэн сарын хугацаа байсан бол Дэлхийн миссийн тайзнаас арай өөр бууж ирэх байлаа.

 Үүн шиг юм болохгүйн тулд үндэсний хэмжээнд миссийн тэмцээн зохион байгуулж тэндээсээ шилдэг оролцогчоо шалгаруулан дэлхийн хэмжээний уралдаанд явуулдаг болмоор байх юм. Манай бүсгүйчүүд тус тэмцээнд хангалттай амжилт гаргадаггүйн шалтгаан ч энэ байж болох юм.


Сүхбаатарын Пагмадулам энэ жил 22 настай. Өндөр 175 см, биеийн харьцаа  88:63:90. ЭМШУИС-ийн эмчилгээний ангийн тавдугаар курст сурдаг. СУИС-ийн уртны дууны ангид Ц.Дэлгэр багшийн удирдлага дор хичээллэдэг. “Шилмэл загвар” агентлагийн загвар өмсөгч.  Загварын анхан, дунд, гүнзгий гэсэн шатанд суралцсан.  Өмнөх жил  Малайз улсын Куала Лумпур хотод зохиогдсон “Miss Tourism International” тэмцээнээс уртын дуу дуулж  “Авъяаслаг мисс” өргөмжлөл хүртэж байсан.

Ямартай ч "Desoft media"-гийнхан анкет бөглүүлж, зураг аваад "Дэлхийн мисс" тэмцээний зохион байгуулагч руу илгээдэг уламжлалаар энэ жил С.Пагмадулам өрсөлдөхөөр боллоо.Сонирхуулахад сүүлийн жилүүдэд БНХАУ-ын бүсгүйчүүд дэлхийн миссийн тэмцээнд маш амжилттай оролцож, тэргүүн, дэд байрыг авч байгаа. Энэ жил ч хятадын миссүүд ширүүхэн өрсөлдөгч нарын нэгээр тодроод байна. БНХАУ-аас Wei Wei Yu хэмээн бүсгүй өрсөлдөх гэнэ.

Улс орноо төлөөлөн дэлхийн тэмцээнд өрсөлдөх болсон С.Пагмадуламын хувьд  бага хугацаа үлдсэн ч амжилт хүсье.