Шинээр батлагдсан сурагчдын дүрэмт хувцасны үнэ хэт өндөр байгаа нь иргэдийн дургүйцлийг ихээр төрүүлж байгаа. Тиймээс эцэг эхчүүдийн түр хороо байгуулагдаж дүрэмт хувцасны үнийг бууруулахыг шаардах болсон. Мөн ядуу өрхийг түгшээж байгаа сурагчийн дүрэмт хувцасаар Шинэчлэлийн Засгийн газрынхан бизнес хийж байна гэж ярих иргэд ч байгаа юм. Үүгээр зогсохгүй энэ хувцсыг үйлдвэрлэдэг аж ахуйн нэгжүүдийн ард зарим сайд нар байгаа сураг гарлаа.

Ямартаа ч  “Шинэ дүрэмт хувцас хэт өндөр үнэтэй. Энэ нь олон хүүхэдтэй нэн ядуу, орлого багатай айлуудад маш том дарамт болж байна. Үүнээс гадна дүрэмт хувцсаа эцэг эхчүүдэд танилцуулж ямар нэг санал асуулга явуулалгүй ийм шийдвэр гаргасан. Тэд дүрэмт хувцасны мөнгийг багш нар хурааж байгаа нь багш сурагчдын хоорондын харилцаанд сэв суух, хичээлийн цагаас мөнгө хураахад цаг зарчуулах, цаашлаад тухайн сурагчын гэрт хагарал үүсч болзошгүй гэдгийг хэлээд эцэг эхчүүдэд хандаж “Хэт үнэтэй дүрэмт хувцас авах хэрэггүй” хэмээн уриалж байна” гэж эцэг эхчүүдийн түр хорооноос онцлов.


Эцэг эхчүүд БШУЯ болон ҮХЯ-нд шаардлага хүргүүлнэ гэдгээ мэдэгдээд байгаа юм. Мөн ШӨХТГ-т ч тэд гомдол мэдүүлсэн. Ямартаа ч бид зарим эцэг эхийн төлөөлөлтэй уулзаж ярилцлаа

Баянзүрх дүүрхийн 14-р  хорооны иргэн Д.Болдсайхан: Олон хүүхэдтэй айл энэ дүрэмт хувцсыг авч чадахгүй

-Хамгийн гол нь энэ дүрэмт хувцсыг эцэг эхчүүдэд танилцуулаагүй. Ямар ч байсан шинэ дүрэмт хувцастай болно л гэсэн. Тэгээд үнэ нь хэт өндөр. Өнөөдөр хамгийн багадаа нэг хоёр, түүнээс дээш тав зургаан хүүхэд нь сургуульд сурдаг айлууд бас нэн ядуу айлууд олон байгаа. Тэр айлууд энэ дүрэмт хувцсыг худалдан авч чадахгүй гэдгээ хэлж байна.

Баянзүрх дүүргийн 13-р хорооны иргэн Г.Цэнгэл: Тэтгэврийн хөгшин хоёр хүүхэддээ яаж хувцас авч өгөх вэ дээ

-Би нэг ач, нэг зээтэй. Хоёулаа над дээр байдаг. Нэг нь 5 дугаар анги, нөгөө нь 10 дугаар анги. Бас нэг оюутан хүүхэдтэй. Би өөрөө тэтгэвэрийн хүн. Хэрэв хоёр хүүхдэдээ шинэ дүрэмт хувцас авбал 300-гаад мянган төгрөгөөр авна. Энэ надад маш хүнд тусах нь ойлгомжтой.

О.Магнай: Сурагчийн дүрэмт хувцасны үнэ, материал, тендергүйгээр шалгаруулсан явдалд шүүмжлэлтэй байна

Дээр дурдсанчлан, ШӨХТГ-аас  эцэг эхчүүдээс ирсэн гомдлын мөрөөр БШУЯ болон ҮХААЯ-ынхантай уулзсан.  Улмаар тэд сурагчийн дүрэмт хувцсыг долоон компаниар хийлгэх гэрээг нь Өрсөлдөөний тухай хууль зөрчсөн гэж үзэж байгаа.  Тиймээс дээрх гэрээгээ өөрчлөх, эргэн харах, Өрсөлдөөний тухай хуулийн дагуу сурагчийн дүрэмт хувцас нийлүүлэхэд анхаарах хэрэгтэйг холбогдох хүмүүст сануулсан гэж байгаа. Мөн О.Магнай дарга хэлэхдээ “надад даавууных  нь хэлтэрхийнээс өгсөн л дөө. Мэргэжлийн хүний нүдээр биш ч энгийн хүний нүдээр харахад чанарын ялгаа харагдахгүй байсан. Өөрөөр хэлбэл, сурагчийн дүрэмт хувцас чанарын хувьд өмнөхөөсөө ялгарах юмгүй санагдсан” гэв. Мөн тэрбээр үнийг өндөр байгааг ч шүүмжилж байгаа билээ.

Х.Золжаргал: Оёж болох бүх газруудыг хамруулах үүднээс сонгон шалгаруулалт хийгээгүй
Харин Үйлдвэр, хөдөө аж ахуйн яамны төрийн нарийн бичгийн дарга Х.Золжаргал хэлэхдээ “ШӨХТГ-аас ”Сонгон шалгаруулалт хийлгүйгээр сурагчийн дүрэмт хувцас үйлдвэрлэх компаниудыг сонгосон нь өрсөлдөөний тухай хуулийн 13 дугаар зүйлийг зөрчсөн” гэсэн акт ирсэн байна. Энэ талаар би хуулийн мэргэжилтнүүдтэйгээ ярилцаж байгаад үнэхээр зөрчсөн байх юм бол хуулийн дагуу болгож залруулах болно. Ер нь улсын болон орон нутгийн төсвийн хөрөнгөөр  бараа юмуу ажил үйлчилгээ авахдаа тендер зарладаг. Тэгвэл бид улсын төсвийн мөнгөөр ямар ч үйлчилгээ авахгүй байгаа. Монгол улсын хэмжээгээр бид аттестатчилал явуулсан. Энд манай яамнаас гадна Стандартчилал хэмжил зүйн газар, ШУТИС-ийн Үйлдвэрлэл технологийн дизайныхан, Нэхмэлийн хүрээлэн, ШӨХТГ-ын мэргэжилтнүүд, Нийслэлийн Мэргэжлийн хяналт, Монголын Сурагчдын холбоо, Хөдөлмөрийн эрүүл мэнд судлалын төв зэрэг байгууллагууд оролцсон байгаа. Эдгээр байгууллагууд нь бүх оёдлын үйлдвэрүүдээр явж аттестатчилал хийсэн юм. Ингээд үүнийгээ нэгтгээд “Монголын оёдлын нэгдсэн холбоо”-г байгуулж, сурагчийн дүрэмт хувцасыг оёх үйл ажиллагааг зохион байгуулах гэрээ хийсэн. Тодруулбал, бид юм оёж болох бүх газруудыг хамруулах үүднээс сонгон шалгаруулалт хийгээгүй” гэв.

Сурагчийн дүрэмт хувцасны үнийн тухайд
Мөн зохион байгуулагчид болоод оёдлынхон дүрэмт хувцас 2-3 жилийн эдэлгээ даах чанартай материалаар хийгдэж байгаа гэж байгаа ч иргэд үүнд ихэд дургүйцэж байна. Учир нь хүүхэд өдрөөс өдөрт өсч том болдог. Тэгэхээр 2-3 жил энэ дүрэмт хувцсаа өмсөөд сууж байх юу л бол гэж байгаа юм.  Сурагчийн дүрэмт хувцас өмнөх жилүүдэд худалдаалагдаж байсан үнээс 2400-14000 төгрөгөөр нэмэгдсэн хэдий ч даавууны чанар, эдэлгээ сайжирсан бас сонголттой болсон гэж байгаа. Үнийн хувьд, бага ангийн эмэгтэй хүүхдийн хослол 37 мянган төгрөг,  бага ангийн эрэгтэй хүүхдийн хослол 57 мянган төгрөг, дунд ангийн эмэгтэй хүүхдийн хослол 65-69 мянган төгрөг, дунд ангийн эрэгтэй хүүхдийн хослол 71-72 мянган төгрөг байна. Мөн ахлах ангийн эмэгтэй хүүхдийн хослол 90 мянган төгрөг, ахлах ангийн эрэгтэй хүүхдийн хослол 99 мянган төгрөг аж.

Дүрэмт хувцас оёх ажилд 130 гаруй компани оролцож байгаа бөгөөд үүнээс оёдлын 69, сүлжмэлийн 48, хялгас ялгах найм, ээрэх зургаа компани байгаа юм. Тэд бүгд л 24 цагаар ажиллаж байгаа юм. Гэсэн ч төлөвлөсөн хугацаандаа багтаж дүрэмт хувцас бэлэн болох асуудал тун эргэлзээтэй байгаа билээ. Мөн энэ үнээрээ нийлүүлэгдэж эхэлвэл олон эцэг эхчүүдийн эсэргүүцэлтэй тулгарч эхлэх юм. Түүнчлэн улсын сургуульд арай бага үнээр, хувийн сургуульд энэ үнээрээ өгөх ёстой гэсэн хүмүүсийн дуу хоолой ч сонсогдсоор байна. Тэгэхээр ирэх намар хүүхдүүдийн гар дээр очих дүрэмт хувцас их л олон асуудал дагуулж байж биелэлээ олох нь.

Дараагийн удаад хүүхдүүдийн санал бодлыг ч тусгах болно.