Долларын ханш өсч иргэдийн бухимдалыг төрүүлсээр байна. Бухимдсан иргэд ШӨХТГ-ын дарга О.Магнайг сургалсаар. Цөөнгүй иргэд долларын үнийн өсөлтийн талаарх гомдолуудаа ШӨХТГ-т илгээсэн байна. Тэгсэн ч гэсэн О.Магнай дарга таг чиг. Тэр долларын ханшыг буулгадаг ид шидтэн биш л дээ. Гэхдээ л иргэд горьдсоор. Харин О.Магнай дарга нь суусаар л байна.

    Уг нь тэрээр өмнө задгай долларыг бүхэл доллартай ижил үнээр авах шийдвэр гаргаж ихээхэн дэмжлэг авч байсан.  Харин энэ удаа хөдлөх шинжгүй байна. Сүүлийн үед тэр зарим шийдвэрүүдээсээ болоод ихээхэн эвгүй байдалд орох болсон. Үүрэн холбооны үнийг секундээр тооцдог болох шийдвэр гаргаад хэрэглэгчдийг хохироосон. Бас барилгын үнийг 1м квадратыг нь нэг сая төгрөгт багтаана гэж зарлаад хэлсэндээ хүрээгүй. Барилгынхан эсэргүүцээд юу ч биш болгоод орхисон. Харин энэ удаа долларын ханшийг буулгана гэж шалгалт хийгээд үр дүнд хүрэхгүй бол нэр төрөө дахин алдах хэрэг гарна гэж бодож байх шиг.
    Монгол банк долларын ханшийг яаж бууруулах талаараа тодорхой бодлого гаргасангүй. Эх сурвалжийн мэдээллээр бол вальютын ханшийг барих мөнгөний хомсдолд орсон гэнэ. Тэгээд ч сүүлийн үед Монгол банк “вальютын ханшийг барьдаг газар биш. Шаардлагатай гэж үзвэл зохицуулалт хийдэг” гэсэн мессежийг түгээх болов. Тэдний энэ мессежээр бол бид ханшийг хянахгүй гээд байгаа ч юм шиг. Эсвэл шаардлагатай зохицуулалт хийх цаг болоогүй гэж хэлэх гээд ч байх шиг. Нэг л ойлгомжгүй болоод явчихав.

    Өөр эх сурвалжуудын мэдээлж байгаагаар бол эдийн засгийн хямрал болох гээд байгааг манай томчууд гадарлаж байсан. Тиймээс хамаг хөрөнгөө вальют болгосон учир санаа зовох юмгүй байгаа бололтой. Хөрөнгөө вальют болгосон томчууд юундаа ч санаа зовох вэ дээ. Гэтэл төрийн байгууллагууд нь асуудлыг бие бие рүүгээ чихсээр л байна. Энэ хооронд ард иргэдийн төгрөг цаас болж хувирах эхлэл тавигдаж байх шиг.