Чингэлтэй дүүргийн ИТХ-ын төлөөлөгчид даргынхаа үйл ажиллагааг эсэргүүцэн энэ сарын эхээр хэвлэлд хандсан билээ. Учир нь тус дүүргийн ИТХ-ын дарга Д.Бат-Эрдэнэ нь хууль зөрчин зөвхөн ажлын өрөөгөө гэхэд 70 гаруй сая төгрөгөөр тохижуулж, төсвийн 59 сая төгрөгөөр машин авч унасан гэдэг. Ингэхдээ тэрээр тендер зарлалгүйгээр өөрийн компаниар засварын ажлыг хийлгүүлж, цаашлаад өрөөнийхөө тавилгыг танилынхаа компаниас авсан гэх.

  Тиймээс Чингэлтэй дүүргийн ИТХ-ын төлөөлөгчид түнийг “Бараа бүтээгдэхүүн худалдан авах, ашиг сонирхлын зөрчил байхаас гадна эрх мэдлээ хэтрүүлэн ашиглаж хууль зөрчиж байна” хэмээн үзэж байгаа аж. Мөн 80 сая төгрөгөөс дээш үнийн дүнтэй бол олон нийтийн хэвлэл мэдээллийн хэрэгслээр ил тод зарлуулан явуулах ёстой гэсэн хуулийн заалтыг зөрчин үнийн дүнг бага хэмээн сонгон шалгаруулалтын аргыг хэрэглэж өрөөгөө засуулсан  нь тус дүүргийн ИТХ-ын төлөөлөгчдийн бухимдлыг ихээхэн хүргээд байгаа юм. Тиймээс ганц хурган дарга төсвийн мөнгийг үрж, тансаглаж суухыг цаашид хараад сууж байж чадахгүй хэмээн Д.Бат-Эрдэнийг Нийслэлийн прокурорын газар, АТГ-т хандан хууль зөрчсөн эсэхийг шалгуулахаар албан бичгийг явуулсан юм. Бүр цаашлаад ЧД-ийн Засаг даргын тамгын газар болон АТГ-ын өмнө жагсаал хийн эсэргүүцлээ илэрхийлсэн.

   Энэ сарын 2-нд Чингэлтэй дүүргийн ИТХ-ын ээлжит бус хурал болж, Д.Бат-Эрдэнийн асуудлыг авч хэлэлцэх байсан ч АН-ын бүлэг завсарлага авч хурлыг хойшлуулжээ. Харин АН-ын бүлгийг завсарлага авсан хойгуур Д.Бат-Эрдэнэ дарга өөрийн намын гишүүдийг цуглуулан нууцаар хуралдсан гэж эх сурвалж мэдээлллээ. Хуулийн дагуу 14 хоногийн завсарлага авсан учраас энэ сарын 16-нд ИТХ дахин хуралдах ёстой. Гэтэл Д.Бат-Эрдэнэ дарга шөнө хурлаа хийсэн учраас 16-ны өдөр дахин хуралдахгүй хэмээн бухимдаж байгаа аж. Харин хуралд оролцож чадаагүй АН-ын бүлгийнхэн дахин хурал болох ёстой хэмээн үзэж байгаа аж. Завсарлага авсан хойгуур нууцаар хуралдах дүрэм, журам байхгүй гэдгийг тус дүүргийн ИТХ-ын төлөөлөгчид хэлж байгаа юм. Хэрвээ 16-нд хурал болох юм бол Д.Бат-Эрдэнийн асуудлаар хэлэлцэх аж. Хэрвээ Д.Бат-Эрдэнэ даргын буруутай нь тогтоогдвол торгуулийн арга хэмжээ авахаас эхлээд эрүүгийн хариуцлага ч оноож болох юм байна. Эцсийн шийдийг хууль хяналтын байгууллага гаргана. Ямартай ч Д.Бат-Эрдэнийн буруутай гэсэн баримт материалыг хуулийн байгууллагад өгсөн ба АТГ-т мэдүүлээд байгаа юм.

Д.Бат-Эрдэнэ нь өнгөрсөн сонгуулиар МАН-аас Чингэлтэй дүүргийн ИТХ-д сонгогдсон хүн юм. Мөн хуурамч дипломны эзнээр тодорч, түүнээсээ болж Нийслэлийн Авто Замын Газрын даргын суудлаасаа мултарч байсан гэдэг.  МАН-ын гишүүн Д.Бат-Эрдэнэ хаа очсон газраа асуудалд ороод байх бололтой. Тэрээр доод албан тушаалтнууддаа “Би хууль зөрчөөгүй. Чи шалгуулдаг газраараа явж шалгуул. Би хаана ч тансаглана.  Хуучин авто замын газар байхдаа ч ингэж байсан. Зам засвар арчлалт улсын үйлдвэрийн газар байхдаа ч бас иймэрхүү байсан. Үүнийгээ хэнээр  ч заалгуулахгүй” гэж томордог байна.