Шинээр баригдаж буй “ Мянган оюутны байр”-ны барилгын ажилтай танилцахаар УИХ-ын гишүүн А.Телехан, Ц.Даваасүрэн болон БШУЯ-ны Барилга захиалагчийн албаны дарга О.Мөнхбаяр нар өнөөдөр газар дээр нь очиж ажилалаа. Мянган оюутны байрны барилгын ажил нь 2011 оноос эхэлсэн бөгөөд өнгөрсөн жилийн есдүгээр сард ашиглалтанд орох ёстой байсан билээ. Гэтэл зураг төсөлд ороогүй гэсэн шалтгаанаар энэ жилийн есдүгээр сарын 1-н хүртэл хойшлуулаад байсан ч ирэх сардаа ч багтаж ашиглалтад орохооргүй байдалтай байна.

Учир нь уг барилгын дулааны шугамыг тавихад саад болж байсан барилга байшинг холдуулах, хуучин бохирын шугамуудыг шинэчлэх, зэргэлдээ орших МУБИС-ын оюутны байрны өрөөний зохион байгуулалтыг өөрчлөх болон гадна орчинг тохижуулах ажилд хөрөнгө дутсан байна. Уг нь тус барилгын ажилд зориулж өнгөрсөн жил нэг тэрбум төгрөгийг улсын төсөвт суулгасан хэдий ч Эдийн засгийн хөгжлийн яамнаас төсөвт өртгөө нэмэгдүүлээгүй гэсэн шалтгаанаар гүйцэтгэгч компаниудад санхүүжилтыг одоо болтол олгоогүй байгаа аж. Гэсэн ч гүйцэтгэгч компаниуд өдийг хүртэл дээрх нэмэлт ажлуудыг өөрсдийн хөрөнгөөр хийгээд дуусчээ. Үлдсэн ажлыг хийж дуусгахын тулд хөрөнгө, санхүүжилт маш их хэрэгтэй байгаа бөгөөд энэ асуудлыг шийдэж өгөхийг холбогдох албаны хүмүүсээс хүссэн юм.


Ц.Даваасүрэн гүйцэтгэгч компаниудад хандаж “Есдүгээр сарын 1-н гэхэд энэ байрыг ямар нэг аргаар ашиглалтанд оруулах хэрэгтэй. Ашиглалтанд оруулсан тохиолдол 10 сардаа багтаан санхүүжилт олгох асуудлыг баталгаажуулж өгье. Яамд  шалтаг тоочоод байвал бид УИХ-аас шийдвэр гаргаж өгнө. Тиймээс та бүхэн энэ асуудалд санаа зоволгүй ажлаа хийцгээ. Зүгээр л яамдын хүнд суртлаас болж ялихгүй шалтгаан гаргаж ирэн санхүүжилтын асуудлыг удаашруулж байна” хэмээсэн юм.
Харин БШУЯ-ны Барилга захиалагчийн албаны дарга О.Мөнхбаяр “Төсөв нэмэгдсэнтэй холбогдуулан гүйцэтгэгч компаниудын гаргаж өгсөн бичиг баримтуудтай танилцсан. Үнэхээр энэ байрыг барихад нэмэлт ажил олон гарч ирсэн. Манай яамнаас сайдын түвшинд бүх баримт бичгийг сангийн яаманд гаргаад өгчихсөн байгаа” гэсэн юм.

Дээрх бүгдээс үзэхэд мянган оюутны байрны нэмэлт санхүүжилтын асуудлыг Эдийн засгийн хөгжлийн яам гацаагаад байгаа аж. Энэ байрны ажил одоогоор 95 хувьтай байгаа бөгөөд 7-10 хоногийн ажил үлдсэн байна. Мөн хэзээ оюутнуудаа авах талаар албаны хүмүүсээс тодруулахад ирэх сарын 20-д гэхэд бүрэн ашиглалтанд орчих байх гэсэн эргэлзээтэй тайлбарыг хэлж сууна. 

Дашрамд дурдахад Мянган оюутны байр нь давхар бүртээ долоо өрөө бүхий 14 тасалгаатай. Хоёр өрөө орон сууцны зохион байгуулалттай маш төстэй бөгөөд хоёр тасалгааны дунд нэг ариун цэврийн өрөө, гал тогооны өрөөтэй аж. Өрөөний хэмжээнээс хамаарч нэг өрөөнд 2-4 оюутан амьдрахаар төлөвлөсөн байна.