Хуучнаар Харгиа буюу “Урьдчилан цэвэрлэх байгууламж”-ыг УСУГ-тай нэгтгэх тухай асуудлыг өнөөдрийн НИТХ-аар авч хэлэлцсэн юм. Энэ хурлаас тус байгууламжыг татан буулгаж нэгтгэх шийдвэр гаргасан бөгөөд өөрчлөн шинэчлэх эрхийг нь УСУГ-т өглөө.

“Харгиа” цэвэрлэх байгууламж нь өнгөрсөн хугацаанд маш муу технологиор арьс ширний үйлдвэрүүдээс гарсан бохир усыг цэвэрлэх ажлыг хийдэг байсан бөгөөд эндээс гарсан хаягдал хүний эрүүл мэндэд сөргөөр нөлөөлж байгаа нь тогтоогдсоноор 2009 онд “Харгиа” цэвэрлэх байгууламжыг татан буулгаж  “Урьдчилан цэвэрлэх байгууламж” НӨҮГ болгож өөрчилсөн байдаг.

 Ингэснээр тухайн үеийн ХХААХҮЯам тус цэвэрлэх байгууламжийн техник технологийг хоёр үе шаттайгаар шинэчлэхээр болсон юм. Нэгдүгээр үе шат нь 1,5 тэрбум төгрөгөөр хийгдэх бол хоёрдугаар үе шат нь 2,7 тэрбум төгрөгөөр хийгдэх ажил байсан байна.

Харин дээрх хоёр ажилд Аудитын газраас хяналт шалгалт хийхэд хангалтгүй дүн гарчээ. Ялангуяа хоёрдугаар шатны шинэчлэлийн ажил дээр будлиан гарч 1,5 тэрбум төгрөгийг үр ашиггүй зарцуулсан нь тогтоогдсон бөгөөд түүнд нь алданги тооцож нийт 643 сая төгрөгийн актыг  холбогдох хүмүүст нь хүргүүлсэн байна. Одоогоор энэ асуудал хууль хяналтын байгууллагуудаар шалгагдаж байгаа аж.   

Түүнчлэн өнөөдрийн байдлаар “Урьдчилан цэвэрлэх байгууламж” нь аудитын газраас өгсөн актын өр төлбөртэйгээ нийлбэл 700 гаруй сая болж байгаа аж. Энэ асуудалд УСУГ-ын дарга С.Үнэн “Өр авлагын асуудлыг шийдэж байж манайд өгөхгүй бол энэ асуудлууд УСУГ-ын хувьд дарамт болон хувирна. Манай байгууллага өөрсдөө жилдээ 10 гаруй тэрбум төгрөгний алдагдалтай ажилладаг байгууллага. Энэ асуудал цаашлаад УСУГ-ын үйл ажиллагаанд ноцтой нөлөөлж болзошгүй. Үүн дээр анхаарч ажиллаач” гэсэн саналыг онцлох хэлэв.