Өнөөдөр "Алтан гөрөөс-2013" Олон улсын яруу найргийн фестиваль эхэлнэ. Уг фестиваль энэ сарын 10-ныг хүртэл Хэнтий аймгийн нутаг Цэнхэрмандал, Хар зүрхний Хөх нуур-Батширээт, Онон, Хурх-Дэлгэрхаан, Хөдөө арал, Аварга Тосон гэсэн маршрутаар зохион байгуулагдана. "Алтан гөрөөс" наадмын онцлог бол байгалийн сайханд аялангаа шүлэг уншиж, эрч хүч, энерги авдагт байгаа юм.

Тус фестивальд Өвөрмонгол, Герман, Америк зэрэг долоон орны төлөөлөгчид оролцох бөгөөд  манай орноос 15 найрагч оролцох болжээ. Манай орны оролцогчдын хувьд яруу найрагч Ш.Лхамноржмаа, Ц.Эрдэнэбаатбар, Ж.Мөнхбат зэрэг найрагчид багтжээ. Ерөнхий зохион байгуулагчаар "Шинэ мянган" утга зохиолын нэгдэл ажиллаж байгаа бөгөөд тус фестивалийн гол зорилго нь байгаль дэлхийгээ хайрлах үзэл санааг түгээн дэлгэрүүлэх аж.