МУГЖ У.Уранчимэг, СТА Д.Ганцэцэг, А.Ганчимэг нарыг  тун удахгүй нээлтээ хийх гэж буй "Зэрлэг цэцэгсийн хүлэмж" киноныхоо зураг авалтаас болж Драмын театраас хөөгдсөн, арга хэмжээ авахуулсан гэх яриа нэг хэсэгтээ л олны чихийг сортойлгоод байсан.

Тэгвэл энэ мэдээлэл үнэний ортойг тэд өчигдөр болсон киноныхоо нээлтэд зориулсан хэвлэлийн бага хурлын үеэр хэллээ. Тодруулбал тэд театрын хурлыг тасалсан нь тэдэнтэй хийсэн гэрээгээ сунгахгүй байх шалтгаан болжээ.

Энэ талаар жүжигчин СТА  Д.Ганцэцэг “Театраас бид киноныхоо зураг авалтыг хийхээр хоёр өдрийн чөлөө авсан. Харин хуралдаа ирж амжаагүй. Энэ утгаараа бид гуравтай гэрээ хийх боломжгүй гэсэн. Энэ бол театрын зайлшгүй тавих шаардлага. Яагаад гэвэл өнөөдөр Улсын Драмын Эрдмийн театр гэх тэр том театрын уран бүтээлч болсон хэнд ч алдах эрх байхгүй. Тэр битгий хэл таван минут ч хоцрох ёсгүй. Энэ утгаараа бид өөрсдөө хүлээн зөвшөөрсөн. Мэдээж хэн ч гэсэн алддаг. Харин эргээд биднийг аваач гэж гуйх нүүр үнэхээр байгаагүй. Тиймээс бид театраас төрөн гарсан жүжигчид учир театртаа бэлэг барих үүднээс өөрсдөө бие дааж уран бүтээлээ хийхээр болсон. Ингээд үндсэндээ бид гурав өнөөдрөөс эхлэн "Хувьсал" продакшнаар овоглож байгаагаа албан ёсоор зарлаж байна. Өдий зэрэгтээ хүргэсэн театрынхаа ахмад уран бүтээлчдэд талархлаа илэрхийлье” гэсэн юм.