Радио-пеленгаци буюу "үнэг агналт"-ын Ази тивийн аварга шалгаруулах ес дэх удаагийн тэмцээнд манай тамирчид амжилттай оролцоод иржээ. Тус тэмцээн энэ сарын 1-6-нд БНСУ-ын Хонг Чон хотод болсон бөгөөд Азийн 16 орны 250 гаруй тамирчин өрсөлдсөн юм.

Тэмцээний эрэгтэйчүүдийн 21 насны ангилалд Хилийн цэргийн 0151 дүгээр ангийн ахлах ахлагч Н.Мөнх-Эрдэнэ алтан медаль, дэд ахлагч Д.Батзаяа шагналт байрт шалгарсан байна.  Харин эрэгтэйчүүдийн 40-өөс дээш насны ангилалд мөн 0151 дүгээр ангийн ахлах ахлагч М.Нямдорж 19 тамирчнаас зургадугаар байрт шалгарч, манай тамирчид багийн дүнгээр хүрэл медаль хүртжээ.

Радио-пеленгацийг "үнэг агналт"-ын спорт ч гэдэг. Энэ спорт 1970-аад оноос үүсч хөгжсөн түүхтэй. Гэсэнч тэр бүр хvн мэддэггvй. Энэхүү спортын дүрэм их энгийн. Тодруулбал 8-10 км талбайд нуусан хэд хэдэн “үнэг”-ийг тамирчид хайж олох ёстой. Тэгэхдээ тэмцээн болохоос таван минутын өмнө үнэг нуусан талбайг зааж өгдөг бөгөөд үүнээс өмнө хэн ч тэмцээн хаана болохыг мэдэж чаддаггvй дүрэмтэй. Тэмцээн ой мод, ширэнгэ, хад асга, гол горхи бvхий бартаатай газар зохиогддог.

Тамирчдыг тав таван минутын зайтай барианаас гаргадаг бөгөөд өөрийн хүлээн авагчийн тусламжтайгаар үнэгийг байгаа газраас нь илрүүлдэг. Үнэгээ олсон нэг нь өөрт байх тусгай мэдрэгчээр товчлуурт хүрэхэд нэр ус нь цаг хугацаатайгаа комьютерт ордог учраас булхайцах гэсэн асуудал гардаггүй байна.