Ойрад түмний соёлын биет болон биет бус өвийг хамгаалах,  олон нийтэд түгээн дэлгэрүүлж сурталчлах зорилготой   “Их хөгсүү-2” наадам өнөөдөр Чингисийн талбайд эхэлнэ. Энэ үеэр ойрадын үндэсний хувцас хэрэглэлийн баяр болохоос гадна 13 ястны гэрүүдийг барьж хурсан олонд сонирхуулах юм байна. Хоёр өдөр үргэлжлэх энэ наадмыг Ойрад Монголын “Их хөгсүү” холбооноос зохион байгуулж байгаа юм. Наадамд Ойрад угсааны Ховд, Баян-Өлгий, Увс, Дархан-Уул зэрэг 10 аймаг, Улаанбаатар хот, ОХУ-ын Халимаг, Тува, БНХАУ болон АНУ, Франц улсад амьдардаг 13 ястны төлөөлөл оролцоно.

Мөн энэ үеэр Төрийн ордонд ойрад хэл, түүх, соёл шинжлэлийн олон улсын бага хурал болох бол Уран зургийн галерейд ойрад түмний, өв соёл, түүхийн үзмэрүүдийн тухай үзэсгэлэн дэлгэгдэнэ. Харин наадмын хоёр дахь өдөр буюу 14-нд Яармагийн дэнжид бух ноолдооны барилдаан, урианхай сурын харваа, хатираа болон жороо морины уралдааныг зохион байгуулах аж. Үүний дараа Буянт-Ухаа спорт цогцолборт ардын авьяастнууд нэгдсэн тоглолтоо хийснээр энэ наадам өндөрлөх юм. Тус тоглолтод ойрад угсааны 13 ястны туульч, хөөмийч, бий бийлгээч, дуучин, хөгжимчин гээд 500 гаруй ардын авъяастан  оролцох аж.

Түүнчлэн Ойрад түмний энэ наадмын хүрээнд Увс аймгийн “Ойрад” театрын уран бүтээлчид “Ээрэн хүрээ” дуулалт бүжгэн жүжгийг толилуулахад бэлэн болжээ. Жүжиг энэ сарын 15, 16-ны өдрүүдэд Соёлын төв өргөөнд тоглогдоно.

"Ээрэн хүрээ" жүжиг нь 16-17 дугаар зууны үед салж бутарсан Ойрадын ард түмний тухай өгүүлэх бөгөөд жүжгийн зохиолыг түүхийн ухааны доктор На.Сүхбаатар бичжээ.