Тэртээ 1939 онд Халхын голын дайнд Монгол, Оросын хамтарсан дайчид Япончуудыг бут ниргэсний 74 жилийн ойд зориулсан “Зэвсэг нэгт дайчин нөхөрлөл” наадам өнөөдөр болж байна. Наадмыг ОХУ-аас манай улсад суугаа ЭСЯ, Оросын шинжлэх ухаан соёлын төв, Батлан хамгаалах яам хамтран зохион байгуулж байгаа юм.“Зэвсэг нэгт дайчин нөхөрлөл” наадмын хүрээнд манайх болон ОХУ-ын цэргийн албаны төлөөллөөс бүрдсэн цэргийн парад жагсаж, хоёр улсын төрийн далбааг мандуулахаар төлөвлөсөн байна. Мөн "Зарлаагүй дайн"-ы үйл явдлыг харуулсан жүжигчилсэн тоглолт, гардан тулааны болон зэвсэг эзэмших үзүүлэх тоглолтууд болох аж. Түүнчлэн энэ дайнд хэрэглэж байсан зэвсэг, фото зургуудаар үзэсгэлэн гаргахаар ажиллаж байна.
Дашрамд сонирхуулахад 1939 оны тавдугаар сарын 11-ний үүрээр Халхын голд буун дуу тасхийж, бөмбөг дэлбэрч Япончуудын өдөөсөн "Зарлаагүй дайн" эхэлсэн юм. Дайн мөн оныхоо есдүгээр сарын 16-ны өдөр дууссан бөгөөд гурван өдрийн дараа энэ түүхт өдөр тохионо. Үндэсний архивын судалгаагаар энэ дайнд хоёр орны хамтарсан цэрэг армийн 7974 амь үрэгдэж , 15251 хүн шархаджээ.
