Энэ жил ерөнхий сайд асан П.Жасрайн мэндэлсний 80 жилийн ой тохиож байгаа. Тэгвэл энэ ойн хүрээнд эдийн засгийн чиглэлийн багш эрдэмтэн судлаачдийн дунд эрдэм шинжилгээний илтгэлийн уралдаан зарласан байна. Тус илтгэлийн уралдаан нь ерөнхий сайд асан П.Жасрайн манай улсын төр нийгэмд оруулсан хувь нэмрийг хүндэтгэн дурсаж улмаар өнөөгийн улс орныхоо нийгэм эдийн засгийн хөгжилд хувь нэмэр оруулах зорилготой юм байна.

Уралдаанд оролцогчид “Төгрөгийн ханш түүнд нөлөөлөх хүчин зүйлүүд” /Өнөөгийн нөхцөл байдлын үнэлэмж шийдвэрлэх асуудлууд/ сэдвээр илтгэл бичих бөгөөд багаар болон ганцаарчилан оролцож болох аж.  Тэргүүн байр нэг сая төгрөг, дэд байр 750 мянган төгрөг, гуравдугаар байр 500 мянган төгрөгийн шагналыг тус тус хүртэнэ. Түүнчлэн нэгдүгээр байрын шагнал хүртсэн нэг хүнд эрдэм шинжилгээний хуралд илтгэл тавих эрх олгох юм байна.

Шалгарсан илтгэлүүдийг П.Жасрайн 80 насны ойд зориулсан эрдэм шинжилгээний хурлын эмхэтгэлд хэвлүүлж нийтийн хүртээл болгох юм. Уралдаанд оролцох бүтээлүүдийг ирэх 11 дүгээр сарын 1-ны 17.00 цаг хүртэл МУИС-ын Эдийн засгийн сургуулийн байран дахь Статистикийн тэнхимийн 209б тоотод авна  болохоос гадна а.аriunzaya@yahoo.com цахим хаягаар явуулж болох нээ. Мөн Улаанбаатар, шуудангийн хайрцаг 1000 хаягаар ирүүлж болно.

Дашрамд дурьдахад төр нийгмийн нэр зүтгэлтэн Пунцагийн Жасрай нь 1933 онд Говь-Алтай аймгийн Бугат суманд төрж өсчээ. Тэрээр олон улсын дээд боловсролын академийн жинхэнэ гишүүн, Москвагийн эдийн засаг, статистик, информатикийн их сургууль, МУИС-ийн Хүндэт доктор цолтой. Мөн төрөөс Алтан гадас одон, Хөдөлмөрийн гавьяаны улаан тугийн одонгоор хоёр удаа шагнагдаж, Монгол Улсын гавьяат эдийн засагч цол хүртэж байсан хүн юм.