МУГЖ Жавхлангийн санаачилсан Монгол, Буриад, Халимаг, Тува, Өвөр Монголын ахан дүүсээ дуу хуураар нэгтгэх зорилготой “Хамаг Монгол” төсөл хэрэгжиж эхлээд багагүй хугацаа өнгөрсөн. Тэгвэл энэ төслийн хүрээнд “Хамаг Монгол” нэртэй нэгдсэн тоглолтыг энэ сарын 28-нд  Чингисийн талбайд зохион байгуулахаар болсон байна.

Тоглолтонд  250 гаруй монгол  үндэстэн оролцох бөгөөд Тува, Буриад, Халимаг улсуудаас үндэсний соёлын чуулгууд ирэх гэнэ.  Мөн тус тоглолтын  “Олуулаа” уриаг дэмжиж, Монгол улсын ерөнхийлөгч Ц.Элбэгдорж хүрэлцэн ирэхээ мэдэгджээ.

Түүнчлэн  “Хамаг Монгол” төслийн хүрээнд хийгдсэн цомгийн нээлт энэ сарын 26-нд “Хөх нуруут” төв дээр болох аж. “Зээргэнэтийн шил”, “Залбирал”, “Хар хархан харц”, “Хамаг Монгол” зэрэг нийт 18 дуунаас бүрдсэн энэхүү цомог нь монгол үндэстний ая аялгууны гайхамшигийг нэгэн дор багтаан өгснөөрөө ихээхэн онцлогтой юм.