Даль жигүүрээ алдсан ч хэзээч бууж өгөөгүй "Сахиусан тэнгэр" А.Пүрэвмаагийн тухай 24 баримтыг хүргэж байна.

1.    А.Пүрэвмаа 1988 онд төрсөн. Өдгөө 25 настай.

2.    Тэрээр багадаа нэлээд махлагдуу, биерхүү охин байсан бөгөөд түүнийг өндөр, тарган гэж гоочлох хүмүүс нэгээр тогтдоггүй байжээ.

3.    Харин тэрээр маш бага хугацаанд өөрийгөө дайчилж “Монгол модель” агентлагийн загвар өмсөгч болоод зогсохгүй топ н.Болормаагийн хайртай шавь нарын нэг болж чадсан гэнэ.

4.    Тэрээр загвар өмсөгч болсноосоо хойш дизайнеруудын хамгийн хайртай загвар өмсөгч, “Сахиусан тэнгэр” хэмээн нэрлэгдэж монголын загварын ертөнцөд өөрийн байр суурийг эзлээд байжээ.

5.    Харин 2011 оны наймдугаар сард түүнд нэгэн золгүй явдал тохиолдож тэрээр 4 давхраас унаж маш хүнд гэмтсэн. Түүнийг хэвлэл мэдээллээр хайртай залуудаа шидүүлсэн хэмээн бичдэг ч буруутан зүгээр нэг танил нь байсан аж.

6.    Тэр ослоос болж түүний нуруу болон аарцагны яс нь хугарч, хөлийнх нь мэдрэлийн судсууд тасарсан бөгөөд нэг хөл нь шагайнаасаа доош, нөгөө хөл нь өвдөгнөөсөө доош нь мэдээгүй болсон юм. Мөн аарцагны ясны олон хагалгааны дараа түүний нэг хөл нь нөгөө хөлнөөсөө арай богино болж үлдсэн байна.

7.    Энэ хэргийн гол буруутан түүнд ганцхан удаа хагалгааний мөнгө өгчихөөд ял шийтгүүлээгүй байна. Буруутай этгээд болон хоёр гэрч нь хамаг бурууг нь түүнд чихээд гадаадруу гарсан тухай А.Пүрэвмаа саяханы нэгэн ярилцлагадаа дурьджээ.

8. Тухайн үед загвар өмсөгч бүсгүй Япон руу явахаар бэлтгэж байсан бөгөөд онгоцныхоо тийзийг авчихсан, Японд сурч, топ модель болохыг зорьж байсан гэдэг.

9. А.Пүрэвмаа хууль хяналтынхан энэ хэргийг шударга бусаар шийдвэрлэсэн, мөн мөрдөн байцаагчид гомдолгүй гэсэн мэдүүлэг өөрт нь мэдэлгүй бичиж, хэргийг хаасан гэж үзэж байгаа.

10. Тэрээр өөрт нь тохиолдсон энэ аймшигт хэргийн үнэн мөнийг он гаргаад албан ёсны хэвлэлийн хурал зарлаж олон нийтэд дэлгэнэ гэдгээ мэдэгдсэн. 

11. А.Пүрэвмаа анх эмчилгээгүй гэдгээ сонссон тэр үеэ ийн дурссан байдаг. “Хоёр хоног гэртээ ээжийнхээ өвөрт наалдаад уйлж суусан. Хоол ч хоолойгоор давахгүй, ямар ч гэрэл харагдахгүй бүх л юм харанхуй санагдаж хэзээ ч дахин энэ хорвоод алхахгүй гэж бодохоор инээмсэглэл гэдэг зүйл надад байхаа больсон байсан” гэжээ. 

12. Удалгүй түүнийг ээж нь хөгжлийн бэрхшээлтэй иргэдийн төв дээр аваачиж тэнд тэрээр дахин амьдрах итгэлийг олж авчээ. А.Пүрэвмаа “Өөрөөсөө илүү хүнд хүмүүсийг хараад миний зовлон энэ хүмүүсийн дэргэд юу ч биш юм байна гэдгийг ойлгосон” гэжээ.

13. Тэрээр хөгжлийн бэрхшээлтэй иргэдийн “Түгээмэл хөгжил төв” ТББ-ын ажилтан болж хөгжлийн бэрхшээлтэй иргэдэд зориулсан загварын шоу зохион байгуулсан.

14. Тэргэнцэртэй иргэдэд зориулсан загварын шоуны гол загвар өмсөгч болсныхоо дараа тэрбээр UPTOWN сэтгүүлийн нүүрийг чимжээ.

15.    А.Пүрэвмаа ээжтэйгээ амьдардаг бөгөөд түүний ээж өрх толгойлсон эмэгтэй. Ээж нь түүний эмчилгээний төлбөрийг хийхийн тулд газраа, байшингаа, тавилгаа гээд бүхий л зүйлээ зараад дуусч байгаа аж.

16.    Одоо А.Пүрэвмаа бүсгүйд үлдсэн ганц юм нь мобикомын гайгүй дугаар бөгөөд тэрийгээ зарах гэж байгаа. Ээж, охин хоёр тэтгэвэр групп нийлсэн хэдэн төгрөгөөр амьжиргаагаа залгуулдаг байна.

17.    Тэр цоо эрүүл болох боломжгүй. Учир нь  одоохондоо дэлхийн хэмжээнд мэдрэлийн судас залгадаг хагалгаа хийж эхлээгүй юм байна.

18.    Загвар өмсөгч бүсгүй өнгөрсөн жил гаруйн хугацаанд долоон удаа хагалгаанд орсон. Одоо өвчин намдаах эм тариагүй л бол шөнө ч унтаж чаддагүй аж. 

19.    Тэрээр суугаа болсон цагаасаа эхлээд юм бичиж эхэлсэн бөгөөд өөрийнхөө амьдралаар кино зохиол бичиж найруулагч Ж.Сэнгэдоржид өгсөн байна.

20.    Мөн тэрээр Соёл урлагийн яамнаас зарласан хүүхдийн зохиолын уралдаанд хүүхдийн бүрэн хэмжээний кино зохиол бичиж явуулжээ. Харин тэрхүү зохиолыг уншсан нэг хүн түүнд 12 ангитай кино болгоод төсөл болгон хэрэгжүүлвэл ямар вэ гэсэн санал тавиад байгаа аж.

22.    А.Пүрэвмаа одоо загвар өмсөгч гэдэг нэрээ кино зохиолч гэдэг нэрээр солихыг хүсч байгаа аж. Үүндээ ч итгэлтэй байгаа бөгөөд түүний зохиолыг уншсан кино зохиолчид “Чамд бичих чадвар байна, одоо жаахан техник талаас нь суралцчих” гэсэн байна.

23.    Харин одоогоор тэр эцэг эхийнхээ болгоомжгүйгээс болж түлэгдсэн бяцхан үрсэд туслах аяныг өрнүүлээд маш завгүй байгаа. Түүний "Та бол сахиусан тэнгэр" нэртэй аяны хүрээнд хандив цуглуулж, арьс нөхөх аппарат авахаар ажиллаж байна.

24.    Тэрээр фитнессээр уйгагүй хичээллэсний үр дүнд одоо суга таягтай ойр зуур алхах болсон. Энэ талаар тэр “Дасгал хийж эхэлсэнээс хойш хоёр таяган дээр зогсдог болсон чинь эмч нар маань үнэхээр толгой сэгсэрч байсан. Чамайг энэ хэмжээнд хүрнэ гэж бодоогүй, үнэхээр сайн байна гээд магтсан. Миний хувьд нэг таягтай болохын тулд цаашид фитниссээрээ тасралтгүй хичээллэсээр байх болно” гэв.