“Сэтгэл зүрхээрээ надтай хамт байгаа Монголчууд та бүхэндээ баярлалаа. Монголын Боксын Холбоо, дасгалжуулагч болон монгол түмэн та бүхэндээ АЛТАН МЕДАЛЬТАЙ очих болно”. Тиймээ энэ үгийг У.Мөнх-Эрдэнэ өчигдөрхөн монголчууддаа хандан хэлсэн юм.

Казахстаны Алматы хотноо болж буй сонирхогчдын боксын ДАШТ-ны аваргын рингэнд өнөөдөр У.Мөнх-Эрдэнэ ганцаараа эх орноо төлөөлж зогсож байна. Үнэхээр тэр “Ганц дайчин ганцаардахгүй”, “Голсон юм голд” гэдэг үгийг ойрын хэдэн өдрүүдэд монголчууддаа мэдрүүлж чадлаа.

 2009 онд Бакугийн дэлхийн аваргаас хүрэл медаль зүүж байсан тэрбээр өнгөрсөн лхагва гаригт шөвгийн наймын шатанд Узбекистаны боксчин Санжарбек Рахмановыг 3:0 харьцаатай хожсоноор хүрэл медалийн болзол хангаж, дэлхийн аваргын медалиа ихэрлүүлэх боломжтой болсон билээ.

Харин өнөөдөр медалийн өнгөө хувиргах тулаанаа боксын эх орон гэгддэг Куба улсын тамирчин Яснер Лопезтой хийнэ. Түүний тэмцээн Монголын цагаар 16.00 цагт эхлэх бөгөөд уг тулааныг үзэхийг хүссэн монголчууд сэтгэл догдлон хүлээж суугаа нь тодорхой.

Тэрбээр өнөөдрийн тэмцээнд ялсан ч, яалагдсан ч хэн ч түүний амжилтыг чамлахгүй. Учир нь тэрбээр тус тэмцээний медалийн төлөөх тэмцээнд ганцаараа тунаж үлдэн зүтгэж байна. Хэрвээ түүнийг ДАШТ-нд явуулаагүй бол өнөөдөр манай долоон тамирчин бүгд тэмцээнээ өндөрлүүлээд эх орондоо ирсэн байх байсан биз. Харин яг энэ үед У.Мөнх-Эрдэнийг дэлхийн аваргад явуулахгүй байх хориг тавьж байсан П.Сэрдамба онигоонд орж байна.  Хэрвээ У.Мөнх-Эрдэнийг явуулаагүй байсан бол манайх энэ тэмцээнээс нэг ч медальгүй ирэх байлаа. Цаашлаад бүгд медальгүй ирсэн бол П.Сэрдамбын удирдаж буй МОБХ түүхэндээ хамгийн муу амжилт гаргасан нь энэ байх байсан гэж хүмүүс ярьж байна.

Хоёр сарын өмнө МОБХ-ноос түүнийг Дэлхийн аварга шалгаруулах тэмцээнд оролцуулахгүй байх бодлого барьж, шахан хавчиж байсан юм. У.Мөнх-Эрдэнийн хувьд 64 кг-ын жинд чансаагаараа дэлхийд нэгдүгээрт бичигддэг. Тиймээс ДАШТ-д ямар нэгэн шалгуургүйгээр оролцох эрхтэй. Гэтэл МОБХ-ны зүгээс энэ жинд улсын аварга болсон З.Энхзоригийг оруулна гэж нилээн удаан маргалдсан билээ. Улмаар тэдний дунд сорилго хийхээр болж хэн ялсаныг нь явуулна гэсэн юм. Халз тулаан өнгөрсөн сарын дундуур Эрдэнэтийн “Сэлэнгэ” амралтад болж, У.Мөнх-Эрдэнэ 143:142-оор тулаанд илүүрхсэн юм.

 У.Мөнх-Эрдэнэ халз тоглолтын дараа “Миний хувьд спарринг гол зорилго биш ээ. Харин гол зорилго бол ДАШТ. Үлдсэн хугацаанд бие бялдар, сэтгэлзүйн бэлтгэлээ сайн хийж, ДАШТ-д амжилттай оролцохыг хүсэж байна” хэмээн ярьсан. Ямартай ч өнөөдөр У.Мөнх-Эрдэнэ ард түмнийхээ итгэлийг алдалгүй хэлсэн амлалтдаа хүрч чадлаа. Харин ийм тамирчнаа явуулахгүй гэж байсан П.Сэрдамбыг ард түмэн буруутгаж байгаа юм.

Ер нь өрсөлдөөн дундаас товойн гарч чадсан нь дэлхийн рингэнд амжилт гаргах магадлал өндөр байх нь мэдээж. Түүнийгээ ч У.Мөнх-Эрдэнэ харуулж чадаж байна.

Олон  жил манайхан У.Мөнх-Эрдэнийн хосгүй авьяасыг үндэс угсаа, өнгө зүстэй нь холбон тайлбарласан. Гэвч тэрбээр Монголын далбааг мандуулахын төлөө л зүтгэсээр ирсэн. Манай У.Мөнх-Эрдэнэ бол жинхэнэ монгол боксчин. Түүний эцэг нь Францын иргэн, эрдэм номын хүн. Харин У.Мөнх-Эрдэнийн судсаар ээжийнх нь удмын, Монголд боксын спортын үрийг тарьсан "боксёр"-ын цус гүйж байдаг учраас олон жил хөдөлмөрлөн байж дэлхийд зодоглосон тэмцээн бүрээсээ ганзага хоосон ирж байгаагүйг түүх гэрчилнэ. Энэ түүх цаашид ч үргэлжлэх учиртай.