Монголын буддын соёлын сор бvтээлvvдийн нэг “Чойжид Дагины тууж” зохиолыг анх 2005 онд ДБЭТ-т балет болгон тавьж байсан билээ. Тэгвэл өнөөдөр 17.00 цагт тус балетыг дахин тоглох гэж байна. Монгол Улсын ардын жvжигчин, балетмейстр Жамъяандагва хоёр шавийнхаа хамт уг балетыг анх дэглэн тавьж байсан. Хоёр бүлэг,  гурван үзэгдэлт тус балет нь аль хэдийн  Монголын сонгодог урлагийн сор бүтээл болжээ. Өнөөдөр Чойжид дагинад СТА, Г.Батчимэг бүжиглэнэ. Харин Бурханы элчид СТА балетчин А.Өлзий-Орших, Эрлэг Номун хааны элчид СТА, Х.Мөнгөнхөлөг тоглох юм байна.

36 настай Чойжид хэмээх эмэгтэй өвчиндөө шаналан бурханаас аврал гуйна. Гэнэт түүний бие сайжирч баясан бүжиглэж байснаа дахин муудаж үхэтхийн унаж, насан эцэслэнэ.Энэ үед түүний хоёр талд хар хувцаст Эрлэг Номун хааны элч, цагаан хувцаст бурхны элч нар сүнсийг авч одохоор булаацалдан байна.

Бурхны дүр гэнэт тодрон уул эмэгтэйн сүнсийг Чойжид хэмээх Дагина болгон тамын оронд аваачиж нүгэл үйлдсэн хүмүүс хэрхэн зовон шаналж байгааг харуулан, Эрлэг Номун хааны ордны сүр хүчийг үзүүлэн Бурхны орон руу илгээнэ.

Бурханы орон Бурхад, Дарь-Эх, Дагинасууд мөргөлийн бүжиг хийж байх үед Чойжид Дагина хүрэлцэн ирнэ.

Энд буян үйлдсэн хүмүүсийн  жаргалант амьдралыг үзэж тэдэнтэй хамтран  бүжиглэж жаргал цэнгэлийг биеэр мэдэрнэ.Бурхад түүнд хүн төрөлхтөнд нүгэл буяны ялгааг ойлгуулан тайлбарлаж өгөх зарлигийг буулгаж эх дэлхийд нь буцаана.

Т.Энхэлээ