МҮҮН-ны шашин манай улсад газар авч тэр ч байтугай боловсролын салбарт ч гүнзгий нэвтэрсэн талаарх дуулиан нэлээд олон жилийн өмнөөс сөхөгдсөн билээ. Тэгвэл энэхүү асуудал өнгөрсөн жилээс хурцдаж, шүүхийн хаалга татаад байсан юм.
Тодруулбал, Цэнхэр үст Э.Цэрэн нэрээр олонд танигдсан Э.Цэрэндолгор Мүүний шашиныг Монголд дэлгэрүүлсэн гол буруутнаар Боловсролын яамны стратеги бодлого боловсруулах газрын дарга асан Б.Насанбаярыг нэрлэж, дуулиан тарьсан. Энэхүү мэдээллийн мөрөөр уг шашны гаж урсгалын талаарх сурвалжлага хүртэл бэлтгэгдсэн нь ард түмнийг цочирдуулсан билээ. Тэгвэл энэ бүхнийг эсэргүүцсэн Б.Насанбаяр өдгөөгөөс нэг жилийн өмнө буюу 2016 оны 3 дугаар сарын 14-ны өдөр үүрэгт ажлаасаа чөлөөлөгдөх хүсэлтээ өгч, нэр төрөө сэргээлгэх болсноо дуулгаж байсан юм. Тэгвэл түүний нэхэмжлэлтэй шүүх хурал өнгөрсөн оны 8 дугаар сараас хойш хэд, хэдэн удаа товлогдсон ч нэхэмжлэгч Б.Насанбаяр шүүх хуралд оролцох боломжгүй гэдгээ удаа дараа дуулгаж, шүүх хурлыг хойшлуулах хүсэлт гаргаж байжээ.
Энэ талаар тухайн үед Э.Цэрэндолгор өөрийн фэйсбүүк хуудаснаа “Нэхэмжлэгч Б.Насанбаярын нэхэмжлэлээр шүүх хурал боллоо. Нэхэмжлэгч Б.Насанбаяр хоолны хордлогод орсоны улмаас, мөн түүний өмгөөлөгч хөдөө орон нутагт ажлаар яваа учраас шүүх хурлыг хойшлуулах хүсэлт гаргаж. Хариуцагч Цэрэндолгорын зүгээс татгалзах зүйлгүй гэснээр шүүгчид хурлыг энэ сарын 26-ыг хүртэл хойшлуулав. Монголд Мүүнийхэн тодолголтой гаж урсгалын хамгийн том төлөөлөгч болох Б. Насанбаяр өөрийн нэр төр хохирсон гэж нэхэмжилж байна. Энэ бол Монгол дахь гаж урсгалынхны нөлөөг нийтэд илчилсэн иргэн Э.Цэрэндолгорын эсрэг үүсгэсэн шүүх ажиллагаа. Б.Насанбаяр ажил албаа алдан хохироогүй ба өөрөө өөрийгөө Мүүнтэй холбоогүй намайг гүтгэлээ, би хохирлоо хэмээн цацсаар өөрийгөө хүнд байдалд оруулсан хүн. Ахин 14 хоног хүлээх нь... Миний харсан хагас дутуу авсан баримт 860 хуудас боловч цаана нь өшөө олон баримт нэхэмжлэгч гаргаж” хэмээн шүүх хурал хойшилсныг олон нийтэд мэдээлж байв.
Б.Насанбаярын нэр төрөө сэргээлгэх гэсэн шүүх хурал энэ мэт хойшилсоор эцэст нь өчигдөр болсон шүүх хурлаар шүүх бүрэлдэхүүн шийдвэрээ гаргаж, түүний нэхэмжлэлийг хүчингүй болгосон байна. Учир нь энэ удаа ч мөн Б.Насанбаяр болон түүний өмгөөлөгч шүүх хуралд хүрэлцэн ирээгүй аж.
Харин энэ бүхнийг олон нийтийн зүгээс “Б.Насанбаяр нэр төрөө сэргээлгэх бус өөрийгөө МҮҮН-тэй холбоотой гэдгээ баталлаа” хэмээн шүүмжилж байна. Мэдээж нэхэмжлэгч нь шүүх хурлаас удаа дараа “зугтсан" нь энэхүү хардлагыг төрүүлэх шалтгаан болсон биз.
Цэнхэр үст Э.Цэрэнгийн мэдээлж байснаар үнэхээр Б.Насанбаяр МҮҮН-ы урсгалыг боловсролын салбарт түгээн дэлгэрүүлж, хүүхэд залуусыг буруу зүйлд татан оруулж байгаа бол яана гэх айдас ч олны дунд тархаад байгаа нь нууц биш. Учир нь Б.Насанбаяр Боловсролын яамны стратеги бодлого боловсруулах газрын даргын ажлаа өгөхөө мэдэгдсэнээс хойш хэсэг хугацаанд энэхүү албандаа зүтгэсэн. Мөн ажлаа өгснийхөө дараа МУБИС-ын Боловсрол судлалын сургуулийн Зайны сургалтын төвийн эрхлэгчээр томилогдсон нь дээрх айдсыг төрүүлэх болсон юм.
Гэхдээ энэ талаар өнгөрсөн жил Боловсролын Яамны Стратеги Бодлого боловсруулах газрын дарга асан Б.Насанбаяр "Би МҮҮН-ы төрийн бус байгууллагад гурван жил ажиллаж байсан. Гэхдээ одоо бол ямар нэгэн холбоо байхгүй. Түүнчлэн энэ урсгалыг боловсролын салбарт нэвтрүүлсэн асуудал огт байхгүй учир цаашид хууль шүүхийн байгууллагад хандах болно. Энэ талаар холбогдох бүх шатны газруудад хандах болно. Мөн боловсролын салбарт “Мүүн”-ийн бодлого оруулсан нэг ч үйлдэл байхгүй. Энэ салбарт 40 гаруй мянган багш, албан хаагч хүүхэд бүрийг хөгжүүлэх үндэсний хөтөлбөрийг хэрэгжүүлэхээр ажиллаж байна. Ганцхан Б.Насанбаяр гэгч нэг салбарын бодлогыг ганцаараа шийдээд явах боломжгүй" гэдгээ мэдээлж байсан удаатай. Гэсэн ч тэрбээр өөрийн нэр төрөө сэргээлгэх шүүх хуралд ирсэнгүй.
Ямартай ч МҮҮН-ы гэх шашны гаж урсгал манай улсад ямар их газар аваад байсан болоод энэхүү шашинтай гүнзгий холбоотой байсан гэх Б.Насанбаяр өдгөө ч боловсролын салбарт ажиллаж байгаа нь олны өмнө ил тодорхой байна. Харин энэ бүхэн нь монголын ирээдүй хойч үе болсон хүүхэд залууст хэрхэн нөлөөлж байгаа эсэхийг холбогдох албаныхан дахин нэг анхааралдаа авч ажиллана гэдэгт олон нийт найдаж байна.
Б.Энхжин
Сэтгэгдэл (18)