АТГ-аас Мэргэжлийн хяналтын ерөнхий газрын байцаагч нарын авлига авсан хэргийн бичлэгийг олон нийтэд ил болгосон нь ёстой л бөмбөг дэлбэлэх шиг болов. “Оймс”-ны гэх тодотголтой эл хэрэг нийгэмд хээл хахууль бугшиж, тэр хэрээрээ төрийн алба ялзарсны тод гэрч болсон юм. Ганцхан бичлэг задлахад л нийгэм тэр аяараа донсолж байгаа юм чинь АТГ-ын мөрдөн шалгах ажиллагааны үеэр хийгдсэн бусад бичлэгийг дэлгэвэл юу болох бол.
Гэхдээ ийм зүйл болохгүй гэдэг нь тодорхой. Учир нь дээрх бичлэгийг задалсан нь цаанаа улс төрийн эрх ашиг нуугдаж байгааг учир мэдэх хүмүүс хэлсээр л... Наандаж л Ерөнхийлөгч Х.Баттулга АНУ-д хийх албан ёсны айлчлалын бүрэлдэхүүнд Улсын Ерөнхий прокурор Б.Жаргалсайхан багтсан нь цаанаа нэг учиртай байсан нь тодорхой болсон. Нэгэнтээ АНУ-гийн хууль хүчний байгууллагаас авлигын мөнгөөр авсан үл хөдлөх болон хөдлөх хөрөнгийг Монголын талд шилжүүлж өгөхөд туслахаа илэрхийлсэн, дагаад Хууль зүйн сайд бөгөөд Улсын Ерөнхий прокурор нь Монголд айлчлахаар болсон. Эндээс л хээл хахуулийн хэрэгт гар дүрэлцсэн этгүүдийг эхнээс нь намнах ажиллагаа эхэлсний тод гэрчилсэн энэ юм.
Тэгвэл хахууль авч байгаад үйлдэл дээрээ баригдсан бусад хэрэгтнүүдийн бичлэгийг яагаад олон нийтэд дэлгэхгүй байна вэ.
Магад ээлжит бичлэгийг дэлгэвэл АТГ энэ цагийн баатраар тодрохыг үгүйсгэхгүй.
Үгүй ядаж л Эрүүл мэндийн сайд асан Г.Шийлэгдамба авлига авч байгаад үйлдэл дээрээ баригдсан. Тэрбээр 2015 оны арваннэгдүгээр сарын 4-ний 22.30 цагийн орчимд баригдахдаа их хэмжээний мөнгө хахуульд авсан нь баримтаар нотлогдоод зогсохгүй, үүнийгээ ч тэрбээр нуухыг хүсээгүй. Шүүхээс түүнд таван жилийн ял оноож, нэг сая төгрөгөөр торгох шийтгэл оноосон юм. Магад сайд асан гуайд холбогдох эл хэргийн бичлэгийг олон нийтэд дэлгэвэл улс төрийн захиалгатай мэт харагдах боловч хээл хахууль авсан хэнбугайд ч хууль ижил тэгш үйлчилдэг юм шүү гэдгийг илэрхийлэл болох биз ээ.
Төрийн байгууллага дундаас авлигад хамгийн ихээр өртдөгөөрөө гаалийн байгууллага дээгүүрт жагсдаг.
Тэгвэл энэ оны эхээр Дорноговь аймгийн Замын-Үүд дахь Гаалын газрын улсын байцаагч нар хахууль авч байгаад үйлдэл дээрээ баригдсан байдаг. Хэрвээ энэ бичлэгийг задалбал бас л сонин дүр зураг ажиглагдах нь тодорхой. Үүнээс өмнө нь гаалийн байгууллагын цөөнгүй байцаагч нар хахууль авсан хэрэгт удаа дараа холбогдсон учир тагнуул, АТГ-аас шалгалт хийж байв. Шалгалтаар цөөнгүй хэргийг илрүүлж, шүүхэд шилжүүлсэн ч зарим нь замаасаа бултсан гэдэг юм билээ.
За тэгээд хахууль авч байгаад үйлдэл дээрээ баригдсан Эрүүгийн цагдаагийн албаны мөрдөгчид холбогдох хэрэг гээд тоолоод баршгүй хэргийн бичлэг АТГ болоод Эдийн засгийн гэмт хэрэгтэй тэмцэх хэлтэст байх нь тодорхой.
Эдгээр бичлэгийг чимэх бас нэгэн хэрэг бий. Энэ бол Эрүүл мэндийн сайд асан Н.Хүрэлбаатарын гэрт хулгай орсон гэх хэрэг. Хулгайн үеэр нууц сэйф нь алдагдсан бөгөөд шалгалтын үеэр хогийн цэг дээрээс олдсон байдаг. Хулгайч нар сэйфийг онгойлгож чадахгүй болохоороо хогийн цэг дээр хаясан нь энэ юмсанж. Сэйфийг цагдаа нар онгойлготол дотроос нь 2 сая 245 мянган юань, 6000 ам.доллар гарсан түүхтэй. Эцсийн дүндээ хулгай орсон гэх гэр нь сайд асан Н.Хүрэлбаатарынх ч биш, түүний "нууц" хүүгийнх байсан гэдгийг тухайн үеийн хэвлэлүүд бичиж байв.
Хэргийн талаар “Миний сэйф биш. Аав манайд тавьсан” гэж хүү нь мэдүүлж байж. Хэргийг олон жил шалгасан. Эцэстээ Н.Хүрэлбаатар нь Монголоос зугтсан болж таарсан. Удалгүй УМБГ-аас харъяалалын дагуу АТГ хэргийг шилжүүлж авсан гэдэг мэдээлэл цацагдаж байсан юм. Гэтэл 2014 оны дундаар Н.Хүрэлбаатар Монголд ирэнгүүт нь АТГ-аас баривчилсан боловч төд удалгүй сулалсан байдаг. Хэрэг ингээд л замхарсан. Гэтэл хээл хахуулийн мөнгө байж болзошгүй гэх хэргээр шалгуулж, эцэстээ эх орноосоо зугтааж байсан сайд асан гуай Ерөнхий сайд У.Хүрэлсүхийн зөвлөхөөр очсон гэж энэ оны эхээр бас л шуугисан.
Хэрвээ Н.Хүрэлбаатарын сэжиг бүхий сэйфийг онгойлгож буй, түүний АТГ, УМБГ-т мэдүүлэг өгч буй бичлэг олон нийтэд ил болбол У.Хүрэлсүх сайдын нэр хүнд навс унах нь ойлгомжтой.
Энэ мэтчилэн хахуулийн хэрэгтэй холбоотой бичлэгүүдийн жагсаалтыг гаргавал уртаас урт жагсаалт гаргах нь тодорхой. Тиймээс АТГ-ын мөрдөгчдөө гоё харагдаж байна. Дараагийнхаа бичлэгийг задлахгүй юм уу.
Г.Нацаг-Эрдэнэ
