Ерөнхийлөгч асан Н.Энхбаяр өчигдөр Төв аймаг дахь урьдчилан саатуулах төвөөс захидал бичсэн нь улс төрчид гэлтгүй олон хүний анхаарлын төвд байлаа. Авлига авсан хэргээр түүнийг хүч хэрэглэн баривчилсан нь цагдаа, хүчний байгууллагыг шүүмжлэлд өртүүлж, Хууль зүй, дотоод хэргийн сайдын суудлыг ганхуулахад хүрсэн. Олон нийт энэ баривчилгааг Н.Энхбаярын өрсөлдөгчийн явуулга гэж байгаа бол зарим нь төр төмөр нүүр, сүр хүчээ харуулсан гэх нь байна. Үүнд МАХН-ын дарга Н.Энхбаяр захидлаараа дамжуулан өөрийн байр сууриа илэрхийлсэн юм. Сонгууль ойртож “халуурсан” улс төрийн гол сэдэв болоод байгаа Н.Энхбаяр "Монголын түүхэнд тодорсон дөрвөн Ерөнхийлөгчийн Гуравдахь нь шоронд сууж байна. Яагаад?" гэж эхэлсэн захидалдаа юуг цохон дурдсныг 24tsag.mn онцлон хүргэж байна.1. Хамтран зүтгэгчдийнхээ тухайд
МАХН-ын дарга Н.Энхбаяр баривчлагдаж, Төв аймгийн урьдчилан хорих төвд саатуулагдсан цагаас хойш түүнийг суллах, буруугүй гэдгийг нотлох гэж олон хүн хичээж байгаа. Заримыг нь жагсаал цуглаан зохион байгуулж, иргэдийн амгалан тайван байдлыг алдуулсэн гэж цагдаагийнхан байцааж, шалгаж байна. Утсаар дарамтлах, машиных нь цонхыг хагалах зэргээр үл мэдэгдэх хүмүүс дарамталж байгааг МАХН-ынхан хэлсээр байгаа билээ. Тэрбээр захидалдаа өөрийг нь дэмжиж, хамтран зүтгэж байгаа хүмүүсийг нэрлэв. Захидалд Н.Удвал, Л.Цог ба МАХН, М.Энхсайхан, Л.Батцэрэг, Ц.Цолмон ба МҮАН, Б.Жаргалсайхан, Түмэнжаргал ба БНН, Маам, Батбаатар, Наранбаатар, Бум-Ялагч нар ба МНН зэрэг нам, улс төрчдийг дурдсан байна. Тэрбээр хамтран зүтгэгчдийнхээ тухайд “Эдгээр намууд, иргэний хөдөлгөөнийхөн Монголын баялагийг ард түмэнд авч өгөх гээд байна гээд бодоход эрх баригчид нойр нь хүрэхгүй байгаа шүү дээ” гэж бичжээ.
2. Өөрийг нь баривчилахад нөлөөлсөн хүмүүсийн тухайд
Захидалд “600 өвч зэвсэглэсэн цагдаа дайчилж 20, 30-хан хөгшид, залуучууд, 10-аад сэтгүүлч, сурвалжлагч цугласан байр руу тэгэж дайн дажин болж байгаа юм шиг сүр үзүүлэн дайрч, байшин барилга эвдэж, эргэн тойрон байгаа хүмүүсийн амар амгаланг алдагдуулж дайрсан” хүмүүс нь Ц.Элбэгдорж, Д.Дорлигжав, Л.Хурц нар гэж бичсэн байна. Ц.Элбэгдоржийг алхам тутамдаа хууль зөрчиж байгаа гэхийн хажуугаар хууль хяналтын байгууллагуудад өөрийн хань хамсаатнаа хууль бусаар томилж, улс төрийн даалгавар өгч ажиллаж байгаа гэсэн байна. "Шүүх прокурор, АТГ, цагдаа бүхэлдээ эрх баригчдын гарын утсан хүүхэлдэй болж, улс төрийн хэлмэгдүүлэлтийн машин болсныг нотоллоо" гээд өөрийг нь баривчилснаар өнөөгийн олигархийн дэглэм багаа бүрэн хууллаа гэж тэрбээр дүгнэсэн байна.
3. 2008, 2009 оны сонгуулийн тухайд
Өмнө нь МАХН-ын дарга Н.Энхбаярын гэргий О.Цолмон нөхрийг нь суллахгүй бол 2008 оны сонгуулийн үеэр болсон луйвар, булхайг дэлгэнэ гэж мэдэгдэж байсан. Н.Энхбаяр ч өөрөө дээрх захидалдаа “2008 оны луйврын сонгуулийг хийлцэж, өөрөө 2009 оны луйврын сонгуулиар гарч ирсэн Ц.Элбэгдорж алхам тутамдаа хууль зөрчиж” байгаа гэсэн байна. Үүнээс үзвэл түүнд болон түүниий хүрээнийхэнд 2008,2009 оны сонгуулиар иргэдийн саналыг луйвардаж авсан тухай нэлээдгүй, бас ноцтой баримтууд байдаг бололтой.
4. Оюу толгой ордын тухайд
Тэрбээр захидалдаа ажлаа өгсөн цагаас нь хойш элдвээр оролдож шалгаж байгаагийн нэг шалтгаан нь Оюу толгойн ордын гэрээ гэв. Оюу толгойн ордыг гадныханд өгсөн хариуцлагагүй гэрээг шалгахын оронд олон нийтийн анхаарлыг өөр зүйлд сатааруулах гэсэн улс төрийн зорилготой баривчилгаа болсныг тэмдэглэн хэлсэн байна. Н.Энхбаяр “Эрх баригчид “далд” эздийнхээ даалгаврыг биелүүлж Монголд ашиггүй Оюу толгойн гэрээг үхэн хатан хамгаалж байна. Таван толгойн гэрээг ард түмэндээ дундын баялаг гээд 100 хувь өг гэхэд энэ ордоос хагартлаа баяжиж буй цөөн тооны олигархууд амиа тавьчихаас наагуур юм болж сандралдаж байна” гэжээ.
5. Таван толгой ордын тухайд
Мөн түүний үгэнд Таван толгойд ил далд аргаар шургалан вагон вагоноор нүүрс гаргаж, уул уурхайн мөнгө халаасалж буй өнөөгийн эрх баригчидын луйврыг шалгах хэрэгтэй гэсэн санаа байгаа юм. Тэгэхээр чухам хэн тэгэж Таван толгойн нүүрсийг вагон вагоноор зөөгөөд байгааг талаар мэдээлэл түүнд байгаа бололтой. Нөхцөл байдал хурцадвал энэ тухай баримтуудыг ч дэлгэхийг үгүйсгэхгүй.
6. Өөрийн амь насны тухайд
Экс тэргүүн хатагтай О.Цолмон нөхрийнхөө амь насанд ихэд санаа зовж байгаа талаараа хэвлэлд ярилцлага өгөх болгондоо дурдаж байна. Н.Энхбаяртай хамт хоригдож байсан бие хамгаалагчийг нь нэг гаргаж, нэг оруулах зуур түүний бие, эрүүл мэндэд халдах вий гэж эмээж байгаагаа хэлсэн. Тэрбээр “Манай хүний амь нас баталгаагүй болчихлоо. Амь нас, эрүүл мэндэд нь хохирол учирвал төрөөс нэхнэ” гэж мэдэгдэж байв. Тэгвэл Н.Энхбаяр ч мөн захидалдаа амь насанд нь аюул учрах магадлалтай байгааг бичсэн байна. Н.Энхбаяр “Цаашид ч миний амийг хороохыг завдахыг үгүйсгэх аргагүй!” гэжээ.
7. Өөрийн алдааны тухайд
Н.Энхбаяр бол Бурхан шашинд сүсэгтэй нэгэн. Бурхны шашны сургаалийн тухайд ч энд тэнд ярьж явдаг тэрбээр өөрийн алдааны тухайд өмнө нь ч дурдаж байсан. Тэрбээр “Бурхан биш учир алдалгүй яахав. Монголчуудын маань амьдрал хүнд хэцүү байгаа цагт “Би алдсан, бас алдсаар байна” гэж гэмших ёстой хүн гэж өөрийгөө боддог” гээд сэтгэл дотроо ард түмнээсээ уучлалт гуйж явдаг тухайгаа дурдсан байна. Харин өөрөө хийсэн алдааныхаа төлөө баривчлагдаагүй гэдгээ захидлаараа дамжуулан хэлсэн юм. Н.Энхбаяр: “ Өнөөгийн эрх баригчдын надад хүчээр тулгаад байгаа асуудлыг би хийгээгүй юм шүү”.
8. Хууль бус гэгдэх өмчийн тухайд
Тэрбээр захидалдаа өөрийг нь авлига авсан хэмээн буруутгаж байгаад тайлбар хийжээ. АТГ газар түүнийг “TV9” телевиз, “Өргөө” зочид буудал, “Улаанбаатар Таймс” сониныг хууль бус аргаар өөрийн өмч болгосон гэж эрүүгийн хэрэг үүсгэсэн.
“TV9” телевиз
Түүнийг япончуудын Гандантэгчинлэн хийдэд өгсөн студийг хувьдаа авч, өнөөгийн “TV9” телевизийг босгосгон гэж буруутгаж байгаа. Тэрбээр “Ганданд өгсөн студийн төхөөрөмжийг би ч хувьдаа аваагүй. Харин Япончуудаас Мигжиджанрайсигийг бүтээхэд 150,0 сая төгрөг, Ганданд хэвлэлийн болон телевизийн тоног төхөөрөмж, МУИС-д хэвлэлийн болон телевизийн тоног төхөөрөмж хандивлуулж бэлэглүүлсэн юм” гэж үгүйсгэжээ. Ц.Элбэгдорж, Б.Баабар нар христийн шашныг сурталчилдаг “Ийгл” телевизийг оруулж ирсан тул Н.Энхбаяр “барьцаж” япончуудаас студийн зарим төхөөрөмжийг нь гуйсан тухайгаа бичсэн байна. Япончууд үүний хариуд “Ганданд өгдгөө өгсөн, МАХН-д өгөхгүй, харин та хоёрт хувьд нь цөөн тооны тоног төхөөрөмж бэлэглэе” гэсэн аж. Тэрбээр Гандангаас студийн 2 камер, 1 монтажны ширээ, хэдэн микрофон булааж авах уйваагүй хүн биш гэдгээ захидалдаа онцолсон байв.
“Өргөө” зочид буудал
Н.Энхбаяр өөрийн өмчлөлд байдаг “Өргөө” зочид буудлыг “нэг хуучин байрны орц”, “Улаанбаатар таймс” сониныг “нурсан байшин” гэж тодорхойлсон байх юм. Тэрбээр “Улаанбаатар Таймс” сонины байрыг нураалгаагүй, нураах байсныг ч мэдээгүй гэжээ. Тиймээс “эрх баригчдын намайг буруутгах гэж улайран зүтгэж буй зохиомол хэргийг би хийгээгүй” гэж захидлаараа дамжуулан няцаажээ. Гэхдээ ерөнхийлөгчөөр ажиллаж байхдаа гаргасан "Найман шарга" номоо ямар мөнгөөр хэвлүүлсэн тухайгаа тайлбарлаж, дурдаагүй байна.
9. Н.Энхбаярын уриа
Үнэнийг илчилснийх нь төлөө залхаан цээрлүүлж айлгаж чадвал!, Ард түмэн айвал гэсэн үг! Бүү ай!
Харин ард түмэн эрх баригчдаа солих эрхтэй. Сонгуулиар саналаа МАН, АН-д битгий өг! Ердөө л энэ. Миний ард түмэн үүнийг хийж чадна.
Дарангуйлагчид зайлцгаа!
Шударга ёс ялна. Бид ялна!
Монголчууд ялна!
Дараагийн удаад 24tsag.mn Н.Энхбаярын тайлбарлах, нотлох, няцаах, дурдах шаардлагатай байсан ч захидалд "багтаагүй" баримтуудыг нийтлэх болно.
24tsag.mn
