Айлчлалын эхний өдөр буюу 4 дүгээр сарын
20-ны өдөр ҮСХ-ны дарга С.Мэндсайхан ХСГ-ын ерөнхийлөгч Р.Эгелер тэргүүтэй
төлөөлөгчдийг хүлээн авч уулзлаа. Уулзалтын үеэр ҮСХ-ны удирдах албан
тушаалтнууд Монгол Улсын үндэсний статистикийн тогтолцоо, статистикийн
байгууллагын үйл ажиллагаа, хоёр байгууллага хоорондын хамтын ажиллагааны
талаар товч танилцуулга хийв. Хамтран хэрэгжүүлж буй “Монгол Улсын Үндэсний
Статистикийн тогтолцоог бэхжүүлэх – МОНСТАТ” төслийн хэрэгжилтийн талаар ҮСХ,
ХСГ-ын зүгээс танилцуулга хийж, тус төслийг хэрэгжүүлэхэд цаашид анхаарах
асуудал, төслийн дараагийн шатны үйл ажиллагааны талаар санал солилцов.
ХСГ-ын ерөнхийлөгч Р.Эгелер хоёр талын
хамтын ажиллагааг хөгжүүлэхийн зэрэгцээ МОНСТАТ төслийг амжилттай хэрэгжүүлж
байгаад баяртай байгаагаа илэрхийлээд тус төслийн дараагийн шатны үйл
ажиллагааны цар хүрээг тодорхойлох, хэрэгжүүлэх чиглэлээр хамтран ажиллах
боломжтой гэдгээ тэмдэглэв.
Уулзалтын төгсгөлд Монгол Улсын Хүн ам,
орон сууцны тооллого, Аж ахуй нэгж, байгууллагын тооллого, Хөдөө аж ахуйн
тооллогын тоо мэдээллийг Газар мэдээллийн системтэй хэрхэн холбож, хэрэглэгчийн
мэдээллийн сан үүсгэн ажиллаж байгаа талаараа ҮСХ-ны удирлага ХСГ-ын
төлөөлөгчдөд танилцуулав.
Монгол Улсын ҮСХ-нд хийж буй албан айлчлалынхаа
хүрээнд ХСГ-ын ерөнхийлөгч Р.Эгелер УИХ-ын
Дэд дарга Г.Батхүүд бараалхалаа. Тус уулзалтын үеэр УИХ-ын гишүүн Л.Болд, Р.Буд
нар байлцлаа.
