МАХН-ын дарга Н.Энхбаярыг АТГ-аас энэ сарын 13-ны үүрийн 06.00 цагт баривчилсан. Энэ үйл явдлын тухай өглөө нь ХЗДХЯ-ны сайд Ц.Нямдоржоос тодруулахад, “Би юу ч мэдээгүй унтаж байсан” гэх тайлбарыг өгсөн. Түүний энэ тайлбарыг сонссон зарим нэг гишүүд “Монгол даяар үймээн самуун үзээд унтаж чадаагүй. Гэтэл ганцхан хүн л тайван унтаж байсан. Тэр нь ХЗДХЯ-ны сайд Ц.Нямдорж” хэмээсэн. Тиймээс өнөөдөр ХЗДХЯ-ны сайд Ц.Нямдоржид тэтгэврийн хөгшчүүл 14 инчийн зураг бэлэглэхээр Төрийн ордны гадна цуглав. Тэд зурагтныхаа хайрцаг дээр “Ц.Нямдоржид бэлэглэв. Өвөө эмээ нараас нь” гэсэн бичсэн байлаа.
Зурагтыг гардуулж өгөхөөр ирсэн 93 настай Н.Должин эмээ “МАХН-ын дарга Н.Энхбаярыг хууль, хүчнийхэн хүч хэрэглэн баривчилсныг 12-13-нд шилждэг шөнө Монголын бүх ард түмэн мэдсэн байсан. Энэ талаарх бүх мэдээллийг хүмүүс цэнхэр дэлгэцээрээ шууд хүлээн авсан. Харин ХЗДХЯ-ны сайд Ц.Нямдорж зурагтгүй юм уу, ганцаархнаа мэдээлэлгүй хоцорсон байсан. Иймээс бид төрийн сайд хүн мэдээллээс хоцорч хэрхэвч болохгүй гэж үзээд энэ 14 инчийн зурагтыг гардуулахаар болсон. Энэ зурагт хэдийгээр оригнал брэндийн зурагт биш боловч сонгууль өнгөртөл Ц.Нямдорж сайдыг мэдээ мэдээллээр хангалттай хангаад байж чадна. Мөн бид зурагтаа ерөнхий сайд С.Батболдод гардуулж өгнө. С.Батболд ХЗДХЯ-ны сайддаа гардуулж өгөх байх. Түрээсийн байранд амьдардаг, зурагт үзэх боломжгүй ядарсан сайддаа тэтгэврийн хөгшид бид тав, арван цаас нийлүүлж байж зурагт авлаа” хэмээн ярив. Одоогоор зурагтыг гарч ирж аваагүй учир иргэний хөдөлгөөнийхөн зурагтаа авахыг шаардаж жагссаар байна.
Б.Чимэг, Б.Баяр
