Монгол улсын засгийн газраас бага, дунд орлоготой иргэдийг орон сууцжуулах, тэр дундаа залуу гэр бүлийн амьдралд тун хэрэгтэй хөтөлбөрийг хэрэгжүүлж эхлээд буй. Энэ бол “100 мянган айлын орон сууц хөтөлбөр”. Энэ хөтөлбөрийг хэрэгжүүлж эхлээд багагүй хугацаа өнгөрлөө.

   Монгол улсын засгийн газраас бага, дунд орлоготой иргэдийг орон сууцжуулах, тэр дундаа залуу гэр бүлийн амьдралд тун хэрэгтэй хөтөлбөрийг хэрэгжүүлж эхлээд буй. Энэ бол “100 мянган айлын орон сууц хөтөлбөр”. Энэ хөтөлбөрийг хэрэгжүүлж эхлээд багагүй хугацаа өнгөрлөө. Анхандаа иргэдийн ихэнх нь 6 хувийн хүүтэй боломжийн гэцгээж байсан ч харин сүүлийн үед тун ч ам муутай байх боллоо. Иргэд ийнхүү боломжийн гэж дүгнэж байсан “100 мянган айлын орон сууц” хөтөлбөрийг шүүмжлэх болсон шалтгаан нь “Төрийн банк”-наас гаргаж буй муу мэдээлэл юм.
   Хөтөлбөрийн хүрээнд “Төрийн банк”, “Капитал банк” гэсэн хоёр банкаар дамжуулан иргэдэд орон сууцны зээл олгож байгаа. Уул шугамандаа орон сууцны зээлд хамрагдах хүсэлтэй иргэд эхлээд барилгын компанитай гэрээ хийсэн байх шаардлагатай. Дараа нь гэрээгээ Орон сууцны санхүүжилтийн корпорацид өгнө. Харин корпораци “Төрийн банк”, “Капитал банк” руу шилжүүлснээр иргэн зээл авах боломжтой болно гэсэн байдаг. Гэтэл “Төрийн банк” зээлээ олгохдоо яаж ганц өрөө байртай болъё доо гээд явж буй иргэдээс барьцаа хөрөнгө шаардаж байгаа гэнэ.
   Хамгийн гол нь урд нь ч гэсэн иргэд орон сууцны зээлд хамрагдах гэхэд учирдаг гол бэрхшээл нь барьцаа хөрөнгө байсан. Барьцаа хөрөнгө шаардах шаардахдаа иргэн нэг өрөө байр авах гэж байгаа бол нэг өрөө байр барьцаалж байж зээл авна гэжээ. “Төрийн банк”-наас үүнийгээ тайлбарлахдаа “банк эрсдлээ бодоод барьцаа хөрөнгө шаардаж байна” гэв. Бага, дунд орлоготой иргэдээ сайхан амьдрахад нь тус дэм болж байгаа гэсэн чинь хаана байна. Арай зарим иргэдийн ярьж байсанчлан “100 мянган айлын орон сууц” хөтөлбөр ээлжим сонгуулийн шоу болж байгаа юм биш биз.
   Эрүүл ухаанаар бодоход барьцаанд тавих байртай байсан бол тус хөтөлбөрт хамрагдах гэж буй иргэд аль эрт байртай болчих байсан биз, мөн барьцаалах өөрийн гэсэн байртай байсан бол тэр туссмаа бага, дунд орлоготой иргэд нэмж байр авна гэж үү. Зээл олгож буй “Төрийн банк” эрсдлээ бодсон арай дэндсэн шаардлага тавиад байна. “100 мянган айлын орон сууц” хөтөлбөрийг хэрэгжүүлэгч Засгийн газар зээл олгож буй банкдаа анхаарал хандуулж, шаардлага тавихгүй бол болохгүй нь ээ.