НИТХ-ын дарга Т.Билэгт гадаадад эмчилгээ хийлгэхээр яваад ор сураггүй алга болжээ. Уг нь тэрээр шинэ жилийн үеэр л гадаад явсан бөгөөд одоо хүртэл хаа яваа нь мэдэгдэхгүй байгаа гэж эх сурвалж мэдээллээ. Монгол улсын нийслэлийн ИТХ-ын дарга хүн гадаад яваад дөрвөн сар орчим болоход яагаад түүнийг хэн ч үгүйлэхгүй байна вэ? Үгүйлэхгүй байна ч гэж дээ холбогдох газрууд нь Т.Билэгт даргыг хайгаад олохгүй байгаа бололтой. Холбогдох газрууд гэдэг нь АТГ, эрүүгийн цагдаагийнхан. Эдгээр байгууллагынхан Т.Билэгт даргыг эмчилгээгээ хийлгээд ирэхийг бараг дөрвөн сар хүлээсэн гэнэ.

Учир нь түүнээс асууж тодруулах, шалгах олон хэрэг байгаа бололтой. Мэдээж Т.Билэгт томоохон алба хашдаг учир мэдээлэлтэй байсан. Бас өөрийг нь шалгах гэж байгааг мэдсэн учраас харийн оронд амарч яваа юу аль эсвэл зовж шаналж яваа болов уу гэдэг ч анхаарах ёстой зүйл боллоо. Түүнийг бараг дөрвөн сар хүлээгээд ирэхгүй болохоор нь, хамт ажилладаг хүмүүсээс нь асуугаад мэдэхгүй гэхээр нь холбогдох байгууллагууд интерполоор эрэн сурвалжлахаар болсон гэсэн мэдээлэл тархжээ. Гэвч одоохондоо үүнийг баталж ярих хүн олдохгүй байна.

Ингэхэд гэнэт олны анхаарлыг татах болсон Т.Билэгт дарга гэж хэн бэ? Энэ асуултанд хариулж, олны ой санамжийг сэргээхийн тулд албан ёсны намтараас нь сонирхолтой мэдээллийг авлаа. Тэрээр Говь-Алтай аймагт төрсөн. Нийслэлийн Налайх дүүргийн АДХ-ын гүйцэтгэх захиргааны байцаагчаас ажлын гараагаа эхэлж, Нийслэлийн Хан-Уул дүүргийн Засаг дарга, Нийслэлийн ИТХ-ын тэргүүлэгчдийн дарга, Ерөнхийлөгчийн тамгын газрын дарга (Н.Энхбаярын), Нийслэлийн засаг дарга бөгөөд Улаанбаатар хотын захирагчаар ажиллаж байсан.

Харин одоо Нийслэлийн ИТХ-ын тэргүүлэгчдийн даргаар ажиллаж байгаа. Өөрөөр хэлбэл хоёр удаа (2000, 2007) Нийслэлийн ИТХ-ын тэргүүлэгчдийн даргаар ажилласан туршлагатай, тулхтай нэгэн. Ийм нэгэн нэр хүндтэй эрхэм харь орноос ирж чадахгүй байна. Энэ тухай УИХ-ын гишүүн Х.Тэмүүжин “Надад нэг сонин дүр зураг харагдаад байна. НИТХ-ын дарга Т.Билэгт гадагшаа явчихаад одоо хүртэл ирээгүй л байна. Тухайн үед нийслэлийн засаг дарга байсан, өмнө нь Н.Энхбаярын үед Ерөнхийлөгчийн Тамгын Газрын дарга байсан энэ хүн өмч хувьчлал, авлигын хэрэгтэй холбоотой мэдээлэл бий. Яагаад Монголд ирэхгүй байна” хэмээн асуух, хардах өнгө аястай яриа өгчээ. Өөрөөр хэлбэл түүний эх орондоо ирж чадахгүй байгаа шалтгаан нь Н.Энхбаярын авлигалын хэрэгтэй холбоотойгоос үүдэлтэй аж.

Түүхийг эргэн санавал Н.Энхбаярын хаанчлал эхлэх 2000 онд тэрээр Нийслэлийн ИТХ-ын Тэргүүлэгчдийн даргаар ажиллаж байжээ. Түүнээс хойш Н.Энхбаяртай ойртож Улаанбаатартай холбоотой хувьчлалуудыг нь зохицуулж таарсан бололтой. Ерөнхийлөгчийн тамгын газрын даргыг эс тооцвол насаараа нийслэлийн удирдах байгууллагад ажилласан учир Улаанбаатарыг арван хуруу шигээ мэддэг нэгэн гэж тодорхойлоход буруудахгүй. Өргөө зочид буудал, ордны хажуу дахь балгас болсон барилга зэрэг олон хэргийн гэрч нь Т.Билэгт гэж эх сурвалжууд мэдээлсэн. Тийм ч учраас түүний араас АТГ-ын шургуу хөөцөлдөж байгаа аж. 

Хамгийн сонирхолтой нь НИТХ хэмээх Улаанбаатар хотын иргэдийг төлөөлдөг томоохон байгууллагын амбицтай гишүүд бүтэн дөрвөн сар алга байгаа даргаа хайхгүй, сангалзахгүй байна. Төрийн ажил хийж байгаа нэрээр ийм олон сар алга болоод байхад таг чиг. Уг нь өдийд Нийслэлийн ИТХ-ын сонгуулийг УИХ-ын сонгуультай хамт 6-р сард хийнэ гэж намын бүлгүүд тохирсон. Энэ талаар эрхээ хамгаалаад дуугарчих Нийслэлийн ИТХ-ын овсгоотой гишүүд гэж ганц ч алга. Даргыг нь барих гээд байгаа болохоор айчихсан биз. Одоо сонгууль болоход хоёрхон сар үлдээд байна.

Энэ хооронд Нийслэлийн ИТХ шинэ даргыг сонгох уу үгүй гэдэг асуудлаар хоёр хуваагдчихаад байгаа гэнэ. Нэг хэсэг нь даргаа сонгоод явах хэрэгтэй гэсэн бол нөгөөдөх нь арай хүн чанаргүй хэрэг гэж үзжээ. Ядаж өөрийнх нь ажлаасаа татгалзах эрүүл мэндийн шалтгаантай гэсэн бичиг хэрэгтэй гэж ярьж байна. Ийнхүү Монгол Улсын хүн амын талаас илүү хувь нь амьдардаг нийслэл хотын ИТХ-ын дарга гадаад яваад ор сураггүй олон сар боллоо. Түүний хойноос АТГ-ынхан хөөцөлдөж байгаа бололтой. “Тоглоом” яаж дуусах бол доо гэж санаа зовох хүмүүсийн тоо өдөр ирэх бүр олширлоо.