Төрийн албаны халаа сэлгээ, үндэслэлгүй ажлаас халах, цомхотгол нэрийн дор иргэдийг хохироох үзэгдэл газар авсаар байгаа. Энэ засгийн мөн хуучин засгийн үед ч хууль аятай үйлчилсээр ирсэн энэ тогтолцоог хэн хүнгүй шүүмжилж байгаа ч нэг л ахицгүй явсаар байна. Тиймээс манай сайт төрийн албаны халаа сэлгээ, ажлаас хоморголон халах зэрэг асуудлыг удаа дараа хөндсөөр байгаа. Өнгөрсөн удаад дэд сайд нарын орлогч дур мэдэн бусдыг ажлаас халсан байдал, БОНХЯ-ны шинэхэн сайд ч улс төрийн хуучин бууны хугархай Д.Оюунхорол улс төрийн зорилготой цомхотгол хийсэн талаар мэдээлсэн. Харин энэ удаад МХЕГ-ын халаа сэлгээг хөндөхийг эрэмлзлээ.

МХЕГ-ын даргын суудал улс төрийн намуудын тохиролцооны үндсэн дээр хийгддэг болсныг олон нийт мэдэж байгаа. Ямар сайндаа л Н.Алтанхуягаар толгойлуулсан  Засгийн үед  МХЕГ “морь унасан толгойгүй хүн” шиг нэг хэсэг даргагүй байсан.  Учир нь  тус газрын дарга болох сонирхол  АН, МАХН-МҮАН-ынханд цөөнгүй байснаас ийм байдалтай хэсэгтээ явсан.  Азаар  МХЕГ-ын дарга болох сонирхолтой нөхдүүдийг өөр газар, агентлагийн дарга болгож байж   Д.Батмөнхийг  жинхэлсэн. Гэвч тэрбээр “сайн дураараа” нэртэйгээр ажлаа өгч МАН-ын ажлын албаны дарга байсан Ш.Раднаасэд түүний албан тушаалд томилогдсон.

Ингээд шинэ дарга ирэх гэж байгаа сургаар МХЕГ-т бөөн бужигнаан, далд айдас бий болсон. Өөрөөр хэлбэл, хэн халагдаж, хэн үлдэх бол. Цомхотгол хийж, ажлаас минь салгах болов уу гэх бодол ихэнх ажилчдад бий болж байсан нь нууц биш. Гэвч айдсаа нууж ч амжаагүй байтал шинэхэн дарга халаа сэлгээгээ аль хэдийнэ хийгээд эхэлжээ.

Халагдсан хүмүүсээс гомдол гаргаж, Төрийн албаны зөвлөлд хандсан тохиолдол ч илчлэгдлээ. Тэд МХЕГ-ын даргын үүргийг түр орлон гүйцэтгэгч Ш.Раднаасэд нь 2015 оны 2 дугаар сарын 13-ны өдөр МХЕГ дахь Төрийн албаны салбар зөвлөлийг /салбар зөвлөлийн дарга, гишүүдийг шинээр төрийн албаны зөвлөлөөр батлуулаагүй, хэлэлцэх асуудлаа урьдчилан танилцуулаагүй/ хууль бусаар хуралдуулан МХЕГ-ын стратеги, бүтцийн өөрчлөлтийн хөтөлбөр, бүтэц орон тоо шинэчлэн батлагдсан гэж танилцуулж, шинэ бүтэц орон тоон дээр ажиллах хүмүүст салбар зөвлөлийн дүгнэлт гаргасан. Энэ нь эрх зүйн чадамжгүйн дээр Шадар сайдын тушаалыг зөрчсөн асуудал болсон хэмээжээ.

Төрийн албаны зөвлөлд хүргүүлсэн ажлаас үндэслэлгүйгээр халагдсан МХЕГ-ын Тамгын газрын дарга Б.Төмөрбаатарын гомдлыг бүрэн эхээр нь дор хавсаргая.

Мэргэжлийн хяналтын байгууллагад намчирхах үзэлгүй, цэвэр ариун төрийн нэрийн өмнөөс ажиллагсад л байх ёстой гэсэн хүлээлт нийгэмд бий. Гэтэл бодит байдал дээр энэ нь ташаа ойлголт болж байгаа нь дээрх жишээ мөн доорх тодотголоос харагдаж байна.

Энэ мэт МХЕГ сандал ширээтэй зууралдах биш төрийн албаа чадавхижуулах дээрээ анхаарал хандуулбал дээр юмсан. Халаа, сэлгээнийхээ асуудлыг ч цэгцэлж чадаагүй байтал дараагийн ... хүрээд ирэх вий.

Бид цуврал материал бүрийнхээ араас дэлгэрэнгүй ярилцлага, илүү их баримтуудыг дэлгэх болно.

24tsag.mn