МАХН-ын дарга Н.Энхбаяр сар Солонгост эмчилгээ хийлгэж байгаад сар шинийн өмнөхөн эх орондоо ирсэнийг та бүхэн санаж байгаа биз ээ.

Гэвч түүнийг АТГ-аас баривчлахыг завдаж багагүй шуугиан дэгдээж байсан. Чухам юунаас болж баривчлах болсон талаар тухайн үед тодорхой мэдээллийг аль аль талаас өгөөгүй. Тэгвэл энэ талаар АТГ-ын хэвлэл мэдээлийн төвөөс тодруулахад “Н.Энхбаяртай холбоотой хэргийг цагдаагийн байгууллагад шалгаж байгаад харьяалалын дагуу манайд шилжүүлсэн. Улмаар түүнийг Б.Хуяг, Н.Энхтуяа нартай хамт шалгаж байгаа. Эдгээр хүмүүсийг АТГ-т газарт ирж мэдүүлэг өгөхийг хүлээж байна. Хэн хэн нь ирж мэдүүлэг өгөөгүй байна” гэв.

Н.Энхбаярын хувьд тухайн үед “Улс төрийн зорилгоор намайг шалгах нь утгагүй” гэж байсан .

Харин өнгөрсөн намар түүнийг ЦЕГ-ын Зохион байгуулалттай гэмт  хэрэгтэй тэмцэх газрынхан дахин эрүүгийн хэрэг үүсгэн шалгахаар болсон байв. Энэ нь Сүхбаатар дүүргийн нутаг дэвсгэр дэх “Империал Гоулд” компанийн өмчлөлийн байрыг  Н.Энхбаяр намдаа Америкийн иргэн А.Генсбург гэгчээс  худалдан авсантай холбоотой ажээ. Анх 1.5 сая ам.доллараар худалдан авахаар тохиролцсон ч үлдэгдэл нэг саяыг нь төлж чадаагүй байсан. Тиймээс А.Генсбург нь онц их хэмжээний хохирол учруулсан хэмээн цагдаад гомдол мэдүүлснээс  энэ хэрэг үүссэн юм. Тэгвэл  Н.Энхбаяр нь “Энэ бол эрүүгийн асуудал биш. Иргэний журмаар шийдэх зүйл” гээд байгаа юм. Гэвч бас иргэн Бат-Эрдэнэ гэгчээс 1.2 сая доллар залилж авсан гэсэн гомдол ч цагдаад очжээ. Дээр нь мөн АТГ-аас Н.Энхбаярыг  өөр төрлийн хэргээр шалгах шаардлагатай болсон гэх мэдээлэл байгаа юм.

Д.Ундрах /24tsag.mn/