Өмнөх Засгийн газрын үед Эрүүл мэндийн яамны Төрийн нарийн бичгийн даргаар ажиллаж байсан Н.Түмэндэмбэрэлийг 2013 онд тендерээс их хэмжээний мөнгө завшсан гэх үндэслэлээр Эрүүгийн цагдаагийн газар, Улсын мөрдөн байцаах газраас баривчилсан. Мөрдөн байцаалтын явцад түүний хэрэг нь авлига, албан тушаалын шинж чанартай болох нь тогтоогдсон учраас Улсын мөрдөн байцаах газраас Авлигатай тэмцэх газарт шилжүүлсэн байдаг.

Аль ч яамны хувьд Төрийн нарийн бичгийн дарга гэдэг албан тушаал нь сайдаасаа илүү мөнгө цохих боломжтой томоохон мест байдаг. Энэ суудлаа овжин гаргуунаар ашигласан нэгэн бол Н.Түмэндэмбэрэл юм. Түүний хэрэгт холбоотойгоор мөн ЭМЯ-ны Оношлогоо эмчилгээний тасгийн дарга Д.Гончигсүрэн, мэргэжилтэн П.Отгонжаргал нарын таван хүнийг баривчлан шалгаж байсан билээ.

Тэрбээр Эрүүл мэндийн яамны Төрийн нарийн бичгийн даргаар ажиллаж байхдаа өөрийн эзэмшлийн “Лаб тех” компанийг хууль бусаар шалгаруулж, хуурамч бичиг баримт үйлдэж, хуучин тоног төхөөрөмж нийлүүлэн улсын төсвийн хөрөнгөөс онц их хэмжээгээр завшиж 1.7 тэрбум төгрөгийн хохирол учруулсан байдаг. Мөн явуулын эмнэлэг нэрийдлээр суудлын гурван машин оруулж ирсэн гэх хэрэгт холбогдуулан шалгагдаж байгаа бөгөөд өөр ч албан тушаалын хэргүүд илрэх магадлалтай байгаа юм. Зарим эх сурвалжийн мэдээлснээр “Лаб тех” компани нь сүүлийн гурван жилийн хугацаанд Эрүүл мэндийн яамнаас зарласан тендер болгонд ялж байсан гэх бөгөөд 2012 онд л гэхэд 10 орчим тэрбум төгрөгний ажил авсан гэлцдэг.

Ямартай ч Авлигатай тэмцэх газрын Мөрдөн байцаах албаныхан тус хэргийг яллах дүгнэлт үйлдүүлэхээр прокурорт шилжүүлсэн байна. Харин прокуророос тун удахгүй шүүхэд шилжүүлэх гэж байгаа талаар албаны эх сурвалж онцоллоо.

Д.Ундрах /24tsag.mn/