Хэнтий аймгийн Цэнхэр мандал сумын нутаг Ар хүйтэн гэдэг газарт Багануур дүүргийн иргэн 55 настай, эрэгтэй нь УАЗ-469 автомашинтайгаа төөрсөн гэсэн дуудлагаар 2015 оны 04 дүгээр сарын 04-ний өдрөөс хойш Багануур дүүргийн Онцгой байдлын хэлтсийн 38 албан хаагч, 5 автомашинтай, нийслэлийн Аврах ангийн усчин аврагчид голын мөс хуулж эрэн хайх аврах ажиллагааг явуулсан. Төөрсөн иргэний автомашиныг Хэрлэн голын мөсөнд цөмөрч орсон байдалтай олсныг татаж гаргасан талаар бид мэдээлсэн. Харин жолоочийг олоогүй байсан юм.

Тэгвэл энэ хэргийн талаар НОБГ-ын холбогдох албаны хүнээс тодруулахад "2015 оны 04 дүгээр сарын 07-ны өдрийн 14:00 цагийн орчимд  автомашин унасан газраас ертөнцийн зүгээр урд зүгт 6-7 км орчмоос Хэрлэн голын аралд Буурлын булан гэдэг газраас иргэнийг осгож нас барсан байдалтайгаар олсон. Цогцсыг дүүргийн цагдаагийн байгууллагад хүлээлгэн өгсөн" гэв.

    Мөн Налайх дүүргийн 3 дугаар хороо, Баянгийн энгэр гэдэг газар автомашин цасанд суусан хүн хөлдөх аюултай байдалд байна гэсэн дуудлагыг шөнийн 03 цагт өгснөөр Аврах гал унтраах 28 дугаар ангийн 3 албан хаагч, 1 автомашинтай хүрэлцэн очиход иргэн Б-ны RX350 загварын автомашин цасанд суусан байдалтай байсныг автомашиныг цаснаас татаж гарган аюулгүй газарт хүргэсэн байна.

Д.Ундрах /24tsag.mn/