УИХ-ын чуулганы өнөөдрийн хуралдаанаар Эдийн засаг, нийгмийг 2016 онд хөгжүүлэх үндсэн чиглэл батлах тухай УИХ-ын тогтоолын төслийн хэлэлцэх эсэх хэлэлцүүлгийг хийв.

Монгол Улсын эдийн засаг, нийгмийг 2016 онд хөгжүүлэх үндсэн чиглэлийн төсөлд тусгасан 5 бүлэг, 22 зорилтын 130 бодлогын арга хэмжээг нийтдээ 3 их наяд 839.8 тэрбум төгрөгийн санхүүжилтээр, үүнээс улсын төсвийн хөрөнгө оруулалтаар 233.9 тэрбум төгрөг, Хөгжлийн банкны санхүүжилтээр 110.0 тэрбум төгрөг, гадаад эх үүсвэрээс 267.0 тэрбум төгрөг, төр хувийн хэвшлийн түншлэлээр 3 их наяд 189.0 тэрбум төгрөг, бусад эх үүсвэрээс 39.9 тэрбум төгрөгөөр тус тус санхүүжүүлэхээр төлөвлөн тусгасан аж. Макро эдийн засгийн бодлогын хүрээнд эдийн засгийн тогтвортой байдлыг хангаж, нэг хүнд ногдох дотоодын нийт бүтээгдэхүүний хэмжээг нэмэгдүүлэх, инфляцийн түвшинг 1 оронтой тоонд байлгах бодлогыг 2016 онд хэрэгжүүлэхээр төсөлд тусгажээ. Энэ үеэр гишүүд үндсэн чиглэлд тусгасан ажлуудыг хэрхэн төлөвлөж оруулж ирсэн, хэрэгжих бололцоо байгаа эсэхийг тодруулж байв. Мөн гишүүдийн зарим нь үндсэн чиглэлийг хэлэлцсэнээр үр дүн гарах эсэхэд эргэлзэж байгаагаа хэлээд уг баримт бичгийг боловсруулахаас хариуцлагын шат хүртэлх явцыг хуулинд өөрчлөлт оруулах замаар боловсронгуй болгох шаардлагатай гэсэн саналтай байв.

Тухайлбал, УИХ-ын гишүүн Н.Энхболд, “Засгийн газар хуулийнхаа дагуу өнөөдөр үндсэн чиглэлийг хэлэлцүүлэхээр оруулж ирж байгааг ойлгож байна. Энэхүү баримт бичигтээ баахан мөрөөдлийн жагсаалт биччихдэг. Дараа нь хэнтэй ч хариуцлага тооцдоггүй. Үндсэн чиглэл гаргадаг тогтолцоогоо өөрчлөх хэрэгтэй” гэсэн юм.

ЗГХЭГ-ын дарга С.Баярцогт хуулинд өөрчлөлт ороогүй болохоор хэлэлцэх горимд өөрчлөлт орохгүй байгаа гэсэн тайлбарыг өгөв.

Үүнтэй холбогдуулж УИХ-ын гишүүн Ё.Отгонбаяр хуулийн өөрчлөлтөө яаралтай өргөн барих хэрэгтэй гэсэн бол гишүүд үндсэн чиглэлд хөгжлийн чиглэл хандлагыг  шингээсэн ажлуудыг тусгасан байх ёстой гэж байв. Манай улсын эдийн засаг хамгийн өндөр өсөлттэй жилдээ 17.5 хувьтай байсан. 2012 онд 12.5 хувь, 2013 онд 11.6 хувь, өнгөрсөн жил 7.8 хувьтай гарсан бол энэ жил эдийн засгийн өсөлтийг 5.3 хувь байна хэмээн төсөөлж буй.

ЗГХЭГ-ын дарга С.Баярцогт эдийн засгийн хямралтай байгаа энэ үед эдийн засгаа тэлэх тухайд бус харин тогтворжуулах асуудал чухал байгааг энэ үеэр онцоллоо.

Харин УИХ-ын гишүүд эдийн засаг хүндэрсэн гээд баялаг руугаа сохроор дайрч болохгүй гэсэн байр суурьтай байсан бөгөөд үндсэн чиглэлийн хэлэлцэх эсэх санал хураалтыг үдээс хойшхи хуралдаанаар шийдвэрлэхээр боллоо.

Т.Энхэлээ