МАХН, МҮАН “Шударга ёс” эвслийн бүлэг хуралдаж хуралдаанаар хэлэлцсэн асуудлуудын талаар  бүлгийн дарга Н.Батцэрэг, дэд дарга З.Баянсэлэнгэ нар мэдээлэл хийлээ. Бүлгийн хуралдаанаар Үндсэн хуулийн цэцийн тухай хуулийн төсөл, Үндсэн хуулийн маргаан хянан шийдвэрлэх ажиллагааны болон холбогдох бусад хуулийн төслүүдийг хэлэлцэхээр төлөвлөсөн байсан ч түр хойшлуулсан байна. Учир нь  Ерөнхийлөгчийн зөвлөх Ч.Өнөрбаярыг бүлгийн хуралд урьсан ч ирж амжаагүй учраас энэ удаад хойшлуулсан гэлээ. Энэ талаар тус бүлгийн дарга Н.Батцэрэг “Төсөл санаачлагчид өөрсдөө их санаачлагтай байх, хуулиа өргөн барьчихаад орхичихоор их төвөгтэй. Бид дэмжье гэсэн. Асууж тодруулах зүйл байсан учраас урьж дуудсан харамсалтай нь ирсэнгүй” гэлээ.

Тэрбээр мөн "УИХ-ын гишүүн Н.Алтанхуягийн өргөн барьсан Эрүүгийн байцаан шийтгэх тухай хууль нь хуучин Улсын ерөнхий прокурорын дэргэд байсан Мөрдөн байцаах албыг Авлигатай тэмцэх газар руу шилжүүлсэн нь бодлогын алдаа байсан гэж үзсэн байна. АТГ дээр байгаа албан тушаалын гэмт хэргийг шалгах үйл ажиллагааг явуулж байгаа энэ бүтцийг буцаагаад Улсын Ерөнхий прокурорын дэргэд сэргээн байгуулах нь зүйтэй гэж хууль санаачлагч үзсэн. Бид ярилцаад энэ хуулийн төсөл амьдралаас урган гарсан ийм зүйл байна. Энэ хуулийн төслийг дэмжих нь зүйтэй гэж үзлээ. АТГ бол хээл хахуультай холбоотой асуудлаараа, соён гэгээрүүлэх асуудлаараа, албан тушаалтнуудын хөрөнгө орлогын мэдүүлгийг үнэн зөв бүрдүүлж байх чиг үүргээ хэрэгжүүлээд байх бүрэн бололцоотой” гэв.

Мөн Урт хугацааны хөгжлийн бодлогын баримт бичгийг боловсруулж байгаа ажлын явцын талаар мэдээлэл сонссон байна. Монгол Улсын урт хугацааны 25 жилийн алсын хараатай хөгжлийн бодлогыг боловсруулж эхний баримт бичгийн төслийг ажлын хэсэг гаргасан байгаа. УИХ-ын даргын захирамжаар хоёр дахь үе шатны ажил эхэлнэ. Тиймээс тус бүлэг намрын чуулганаар энэ баримт бичгийг батлах нь зүйтэй гэж үзэж байгаа аж.

Бүлгийн дарга Н.Батцэрэг ярихдаа "Сонгуулийн хууль, Үндсэн хуулийн нэмэлт гэсэн хүрээнд бүлгийн хуралдаанаар хэлэлцсэн. Үндсэн хуулийн нэмэлт дээр одоо явж байгаа төслийг дэмжих нь зүйтэй гэж үзэж байгаа. Батлахын тухайд бүх нийтийн санал асуулга явуулаад батлах нь илүү удаан хугацаанд тогтвортой сайн мөрдөж чадах Үндсэн хууль болно гэж бодож байна. Тиймээс ард түмнээр хэлэлцүүлэх асуудлыг ярилцах ёстой” гэв.  

Сонгуулийн хуулийн хувьд УИХ-ын сонгуульд нэр дэвших 76 нэр дэвшигчийг нэг саналын хуудсан дээр бичээд улсаа нэг тойрог болгоод сонгогч нэр дэвшигчийн өмнөх дугаарыг дугуйлах замаар сонгууль явуулья гэж үзэж байсан. Гэхдээ бидний гаргасан энэ санал ажлын хэсэг дээр олонхийн санал авалгүй унасан. Бидний хоёр дахь санал бол УИХ-ын 76 гишүүнийг 38-ийг нь мажоритор тойргоор 38-ийг нь намын жагсаалтаар гаргаж ирж болох юм. Гэхдээ намын жагсаалтад бичигдсэн нэр дэвшигчдийг бас ард түмэн өөрсдөө дугуйлдаг байхаар зохион байгуулах нь зүйтэй. Зөвхөн намын хаалттай жагсаалтаар нам, эвслийн удирдлагын хүрээнд хүмүүсээ нэр дэвшүүлэд СЕХ-нд хүргүүлснээр өндөрлөдөг одоогийн энэ зохицуулалтаар биш заавал олон түмэн рүү нэр дэвшигч өөрөө очиж өөрийнхөө дэмжлэгийг авч чаддаг ийм хувилбар дээр зогсох ёстой шүү. Аль болохоор сонгууль зардал багатай байх, нэр дэвшигчид болон нам эвслүүдийн хооронд сонгуулийн компанит ажлаа зохион байгуулах, тэгш нөхцлийг хангах талаар хуулийн сайн зохицуулалт хэрэгтэй. Сурталчилгааны материал тараах нөхцлүүд дээр адил тэгш нөхцлийг хангах ёстой гэдгийг бүлгийн дарга Н.Батцэрэг хэлэв.

Т.Хулан