УИХ дахь АН-ын бүлэг хуралдаж энэ долоо хоногт байнгын хороо, чуулганы хуралдаанаар хэлэлцэх асуудлуудын талаар байр сууриа нэгтгэжээ. Бүлгээр хэлэлцсэн асуудлын талаар тус бүлгийн дэд дарга Ш.Түвдэндорж, С.Одонтуяа нар мэдээлэл хийлээ.  

УИХ-ын дарга З.Энхболд өнгөрсөн долоо хоногт Чингис бондын хөрөнгөөс санхүүжиж үйл ажиллагаагаа явуулж буй үйлдвэрүүдтэй танилцсан байна. Тухайлбал, хаягдал цаасыг дахин боловсруулах үйлдвэр мөн ноос, ноолуурын бүтээгдэхүүн үйлдвэрлэдэг үйлдвэртэй танилцжээ. Ингээд Чингис бондын хөрөнгөөс санхүүжсэн ажлууд үр дүнгээ өгч эхэлж байна гэх дүгнэлтийг гаргасан байна. Энэ талаараа ч бүлгийн хуралдаан дээрээ танилцуулжээ.

Үүнтэй уялдуулж, АН-ын бүлэг өнөөдрийн хуралдаанаараа Чингис бондоос санхүүжүүлсэн Аж, үйлдвэрийн чиглэлийн төслүүдийн талаар нээлттэй ярилцжээ. Энэ талаар тус бүлгийн дэд дарга Ш.Түвдэндорж “МАН Засгийн газарт хамтарсан юм бол хамтарсан шиг хамтрах хэрэгтэй. Хамтарсан нэрийн дор хэвлэлээр сөрөг гүжирдлэг явуулж болохгүй. Гишүүд нь “Чингис бондоос идэж ууснаа Эдийн засгийн өршөөлийн хуульд хамруулах нь” гэж гүжирддэг болсон. Ганц ч албан тушаалтан энэ хуулиар чөлөөлөгдөхгүй гэдгийг  албан ёсоор мэдэгдье Цаашдаа ийм байдлаар буруу зөрүү ярьж, гүжирдэх юм бол тухайн гишүүнтэй ёс зүйн асуудал ярьж, хууль хяналтын байгууллагад хандах болно. Тэрбээр мөн "МАН  хоёр их наяд төгрөгийг хавтгайрсан халамжаар тараасан бол манай нам үүнтэй дүйцэхүйц мөнгийг үндэсний үйлдвэрлэлээ дэмжихэд зарцуулж байгаа. Чингис бондын үр өгөөж удахгүй гарах болно гэв” гэсэн юм.

Бүлгийн дэд дарга С.Одонтуяа Чингис бондын өгөөж МАН-ын гишүүдийн хэлж буй шиг огт үр дүнгүй зүйлд зарцуулагдаагүй. Эхнээсээ өгөөж нь мэдрэгдээд эхэлсэн гэв. Өнгөрсөн хугацаанд Чингис бондоос аж үйлдвэрийн салбарыг дэмжихэд зориулж  948.9 тэрбум төгрөг, уул уурхайн салбарыг дэмжихэд зориулж 550 гаруй тэрбум төгрөгийг тус бүр зарцуулсан байна. Ингэснээр экспортыг дэмжих, импортыг орлох бүтээгдэхүүний үйлдвэрлэл бий болгох, хөдөө аж ахуйн салбарыг хөгжүүлэхэд тодорхой дэмжлэг болжээ. Тухайлбал, Хөдөө аж ахуйн бирж байгуулагдсанаар 1 их наяд төгрөгийн арилжаа хийгдсэн. Үр дүнд нь хөдөө аж ахуйн салбар дахь дамын наймаа зогсож, малын гаралтай түүхий эд үндэсний үйлдвэртээ тушаагдах нөхцөл бүрдсэн. Үнийн огцом өөрчлөлт байхгүй болсон. Дээр нь барилгын үйлдвэрлэлийг дэмжих чиглэлээр тодорхой тооны үйлдвэрүүд бий болсон, арьс ширний үйлдвэрүүд технологио шинэчилж, зарим нэг нь бүтээгдэхүүнээ гадаад руу экспортод гаргаж байгаа гээд эхнээсээ үр дүнгээ өгөөд эхэлсэн байна. МАН Засгийн эрхийг барьж байхдаа Оюутолгой, Тавантолгой төслөөс урьдчилгаа хэлбэрээр авсан их хэмжээний хөрөнгийг иргэдэд бэлнээр тараагаад дууссан. Харин Чингис бондоос үр өгөөжөө бодитоор өгөх үйлдвэрлэлд зарцуулсан. АН-ын бүлэг цаашид ч аж, үйлдвэрийн салбарыг хөгжүүлэхэд онцгойлон анхаарч ажиллана гэж тус бүлгийн дэд дарга С.Одонтуяа хэллээ.  

Мөн хуралдаанаар, УИХ-ын гишүүн Н.Алтанхуяг нарын өргөн мэдүүлсэн Эрүүгийн байцаан шийтгэх хуульд нэмэлт өөрчлөлт оруулах тухай, Прокурорын байгууллагын тухай хуульд нэмэлт оруулах тухай хуулийн төслийг хэлэлцээд агуулгыг нь дэмжсэн байна.

Энэ талаар Ш.Түвдэндорж "УИХ-аар хуулийн салбарт хийх өөрчлөлттэй холбоотой олон хуулийн төсөл хэлэлцэгдэж эхэлсэн, мөн цаашдаа хэлэлцэгдэнэ, иймээс эдгээр төслүүдийг хэлэлцэх шатанд Авлигатай тэмцэх газрын харьяанд байгаа Мөрдөх албыг хаана шилжүүлэх вэ гэдгийг шийдэх боломжтой хэмээн бүлгийн гишүүд санал нэгдсэн" гэлээ.

УИХ-ын гишүүн Н.Алтанхуяг нарын өргөн мэдүүлсэн хуулийн төсөлд Авлигатай тэмцэх газрын харьяанд байгаа Мөрдөх албыг Прокурорын байгууллагад харьяалуулахаар зааж өгсөн юм. Гэвч бүлгийн гишүүдийн хувьд “Прокурор хэрэгт хяналт тавих ёстой байгууллага. Үндсэн чиг үүрэг нь ийм байтал Мөрдөх алба харьяалуулах нь зөрчил үүсгэнэ” гэж үзжээ. Тиймээс хуулийн салбарын шинэчлэлтэй холбоотой төслүүдийг хэлэлцэх шатанд хаана харьяалуулах вэ гэдгээ шийдэх юм байна.

Мэдээллийн дараа сэтгүүлчдийн сонирхсон асуултад хариуллаа.

-Тавантолгойн тогтоолын төслийг хэлэлцэх эсэхийг УИХ хэлэлцэх асуудлын жагсаалтад оруулсан байна. Үүнийг бүлгийн хуралдаанаар ярилцсан уу?

-Ажлын хэсгээс өнөөдөр албан ёсоор ажлын хэсгээс мэдээлэл хийгээгүй. Нийт 14 зүйл, заалтаар дүгнэлт гаргах ёстой юм билээ. Одоогоор зарим зүйл, заалт дээр дүгнэлт гараагүй учраас мэдээлэл хийгээгүй. Тиймээс манай бүлэгт мэдээлэл алга.

-Гацууртын ордын асуудлаар танай бүлгийн байр хэвээрээ байгаа юу?

- Байр суурь хэвээрээ. МАН-ын бүлгийн авсан завсарлага дууссаны дараа хэлэлцээд хэлэлцэх эсэхийг шийдээд явах байх.

Т.Энхэлээ