Засгийн газар өчигдрийн хуралдаанаараа зарим нэг албан тушаалын томилгоог хийсэн байна. Бүр тодруулбал, Төрийн өмчийн хорооны дарга асан Ц.Нанзаддоржийг буцаан ажилд нь томилжээ. Энэ нь түүний уг албан тушаалд очиж буй гурав дахь тохиолдол. Хүмүүсийн мэдэхийн Ц.Нанзаддорж нь Төрийн өмчийн хорооны даргаар 10 гаруй жил ажиллаад 2013 онд ажлаасаа чөлөөлөгдсөн байдаг. Үүний дараа Ч.Сайханбилэгийн Засгийн газар байгуулагдаад энэ оны нэгдүгээр сард түүнийг дахин ТӨХ-ны даргаар томилсон юм. Гэтэл хоёр сар гаруй болсон уу, үгүй юу албан тушаалаас нь буулгасан ч өчигдөр дахин томилов. Энэ хугацаанд тэрбээр тамгаа авч зугаатсанаас эхлээд албан тушаалдаа үлдэх янз бүрийн оролдлогыг хийсэн гэдэг. Ямартай ч ийм нэг “элэг авсан” томилгоо Засгийн газар дээр дахин явагдав.

Нэг хүнийг нэг албан тушаалд гурван удаа томилж, буулгаж буй энэ явдал олны анхаарлыг ихээхэн татаж байна. Гэхдээ уг томилгооны цаана эрх, ашгийн том зөрчил нуугдаж байгаагийн илрэл нь энэ юм. Эх сурвалжийн мэдээлж буйгаар Ц.Нанзаддоржийн томилгооны ард УИХ-ын дарга З.Энхболдын “тоглолт” байгаа гэх. Тодруулбал, тэрбээр өөрийн хүнийг Төрийн өмчийн хороонд суулгахаар алалцаж буй нь энэ. Ингэх нь мэдээж өөрт нь ашигтай. Ер нь сүүлийн үед З.Энхболдын гар дүрдэггүй салбар гэж байхаа больж. Тэрбээр Засгийн газрын хийх ёстой ажил руу хошуу дүрэхээс эхлээд үндэсний телевизийн эфирт хүртэл хутгалдаж байна. Тэгэхээр нэгэн цагт даргаар нь ажиллаж байсан Төрийн өмчийн хорооноос эрх, мэдлээ салгаж чадахгүй байх нь аргагүй юм. Хатуухан хэлэхэд, энэ томилгоо Төрийн албыг үнэгүйдүүлж буйн тод жишээ боллоо. Тэр дундаа УИХ-ын дарга нь Засгийн газартайгаа нийлж байгаад Төрийн албаараа тоглож болдгийг ил, цагаанаар харуулав. Энэ хугацаанд Төрийн өмчийн хороо эзэнгүйдэж, төрийн ажил ухарсаар.

 Нөгөөтэйгүүр Төрийн өмчийн хороонд Ц.Нанзаддоржоос өөр хүн дарга хийж болохгүй мэт ойлголт олон нийтэд төрж эхэлж байна. Ц.Нанзаддорж ч энэ албан тушаал руу зүтгээд байхын цаад учир юу байна вэ?. Төрийн өмчийг хувьдаа завшсан хэмээн хэвлэлээр багагүй шүүмжлүүлж, факт, баримт нь дэлгэгдэж явсан хүнийг заавал энэ албан тушаалд томилох гэж улайрдаг эрх, ашгийн том зодоон хэзээ дуусах бол.

Ц.Нанзаддоржийг Төрийн өмчийн хорооны Төрийн өмчийн удирдлага, хувьчлалын газрын даргаар ажиллаж байхдаа албан тушаалаа урвуулан ашиглаж, Тээвэр хөгжлийн банкны 49 хувийг эзэмшдэг байсан, тэрбээр банкны энэ хувьцааг бэлгэнд авсан  байж болзошгүй гэдэг.

 Мөн 90 гаруй км төмөр замын асуудлыг шийдэхдээ авлига авсан байж болзошгүй гэж зарим хүмүүс одоо ч харддаг. Өөрөөр хэлбэл, Дорнод аймаг дахь Улаанбаатар тө­мөр замын Чингисийн далан өртөөнөөс Мардай хүртэлх төмөр зам 1999 онд оросуудаас хүлээж авахад 131 км байжээ. Харамсалтай нь хувь нийлүүлсэн УБТЗ нийгэмлэг 34 км төмөр зам болон салаа зам, суман шилжуүлгийг нь хуулан авч, 82 вагон буюу 4858 тонн төмөр замын рейлс, бэхэлгээг сэлбэгийн журмаар ОХУ-ын хил Борзоор гарган Салхит өртөө руу ачуулсан байдаг.  Ингээд 93 км  төмөр зам үлдсэн бөгөөд үүнийг ашиглаагүй удсан учраас ТӨХ “акт” тавьж хувьчилсан бөгөөд ингэхдээ улсын бүртгэлд бүртгүүлээд 10-аадхан хонож байсан “Бүрхээст хайрхан” компанид төмөр замыг хаягдал материал болгон өгсөн нь ийн хардах шалтгаан болдог юм байна. 1996-2000 оны есдүгээр сар хүртэлх хугацаанд 928 аж ахуйн нэгжийн 46,4 тэрбум төгрөгийн эд хөрөнгийг хувьд шилжүүлсэн гэх тоо баримт байна.

Цаашлаад олон том хувьчлалын хуудуутай хэргийн цаана түүнийг байсан гэж хүмүүс ярьдаг.

Т.Хулан