УИХ-ын чуулганы үдээс хойшхи хуралдаанаар Хотыг дахин хөгжүүлэх тухай хуулийн төслийн анхны хэлэлцүүлгийг хийлээ.
Хуулийн хэлэлцүүлгийн эхэнд Эдийн засгийн байнгын хорооны санал дүгнэлтийг УИХ-ын гишүүн Г.Батхүү танилцуулав. Үүний дараагаар УИХ-ын гишүүн Я.Содбаатар, “Одоогийн дахин төлөвлөлт иргэдийн эрх ашгийг нэлээд зөрчих хандлагатай байгаа. Дахин төлөвлөлтөд хамрагдаж буй иргэдтэй уулзсан уу. Энэ хууль нийслэлийн хүрээнд яригдаж байна уу. Дархан, Эрдэнэт болон аймгийн төвийг хамарч байна уу. Үйлчлэх хүрээ нь хаагуур гэж үзэж байна вэ. Хууль батлагдсанаар Үндсэн хууль болон холбогдох хуулиудтай хэр уялдсан гэсэн үг вэ” гэсэн асуултыг тавьсан. Тус хуулийг боловсруулах ажлын хэсгийн ахлагч, УИХ-ын гишүүн Г.Батхүү, “Одоогийн дахин төлөвлөлттэй ажлын хэсгийнхэн танилцсан. Юунаас болоод асуудал хүндрээд байгаа, гарах арга зам нь юу байж болохыг судалсан. Одоо бол дүрэм журмаар асуудлыг зохицуулж байгаа. Тиймээс энэ асуудлыг хуульчилж байгаа юм. Үндсэн хууль, Газрын тухай хуультай зөрчилдөхгүй. Хуулийн төсөл анх нийслэлийн хэмжээний асуудлыг зохицуулахаар орж ирсэн. Дараагаар хот суурингийн асуудлыг шийддэг байхаар өөрчлөгдсөн” гэлээ.
УИХ-ын гишүүн Су.Батболд хуулийн төслийг хэзээ өргөн барьсан, Хотыг дахин хөгжүүлэх тухай гэсэн хуулийн нэршилд дахин гэдэг үг байх нь зөв үү гэдэг дээр тайлбар хүссэн. УИХ-ын гишүүн Г.Батхүү, "2013 онд Засгийн газраас хуулийн төслийг өргөн барьсан. Хоёр дахь ажлын хэсэг нь байгуулагдаад, ажлын хэсгийг би ахалж ажиллаж байна. Хуулийн нэршил дээр анх хотыг хөгжүүлнэ гэж оруулсан ч дараагаар хот сууринг гэж нэмж өөрчилсөн" гэв. Мөн УИХ-ын гишүүн Д.Тэрбишдагва дахин хөгжүүлэх гэдэг нэршил нь харин ч оновчтой сонголт гэсэн байр суурь илэрхийлэв. Мөн энэ үеэр УИХ-ын дарга З.Энхболд чуулганы хуралдааныг цаг сунгаж хуралдахаа мэдэгдсэн бөгөөд ингэснээр чуулган 19 цагт өндөрлөхөөр болж байна. Чуулган үргэлжилж байна.
Албаны хүмүүсийн тайлбараар бол өнгөрсөн жилүүдэд аймгийн төвүүдийн хөгжлийн ерөнхий төлөвлөгөөг баталсан байна. Түүнд хөгжлийг 15-20 жилээр тодорхойлжээ. Ингэхдээ аймаг бүр өөрийн онцлогт тохируулсан хөгжлийн төлөвлөгөөгөө гаргасан байна. Тухайлбал, Хэнтий аймгийн бүх сумд түүхчдийн оролцоотойгоор аялал жуулчлалын төлөвлөгөөгөө гаргасан аж.
Т.Сар
