УИХ-ын дарга З.Энхболд  сайдад нэр дэвшигчдийн нарын нэрийг энэ сарын 06-ны дотор өргөн барих сануулгыг Ерөнхий сайд Ч.Сайханбилэгт хүргүүлсэн билээ.

Гэтэл энэ сарын 6-ны өдөр амралтын өдөр таарч байсан учраас Ерөнхий сайд өнгөрсөн баасан гарагт сайд нарынхаа нэрсийг өргөн барисан юм.

Тодруулбал АН-ын бүлэг хуралдаж, УИХ-ын гишүүн М.Зоригтыг Зам тээврийн, Г.Баярсайханыг Хөдөлмөрийн, Б.Болорыг Сангийн сайдад тус, тус нэр дэвшүүлэхээр эцсийн байдлаар шийдвэрлэсэн.

Харин Засгийн газарт хамтран МАХН-МҮАН-ын "Шударга ёс" эвслийн бүлэг Ц.Оюунбаатарыг Шадар сайдад, З.Баянсэлэнгийг Барилга, хот байгуулалтын, Н.Батцэрэгийг БОНХАЖ-ын сайдаар томилуулахаар нэрийг нь хүргүүлсэн юм.

Тэгвэл Монгол Улсын Ерөнхийлөгч Ц.Элбэгдорж наймдугаар сарын 4-ний өдөр Монгол Улсын Засгийн газрын гишүүнээр томилуулах хүмүүсийг зөвшилцөхөөр өргөн мэдүүлсэн саналтай танилцаж хариу илгээжээ.

Тэрбээр хариу бичигтээ “Хууль тогтоох болон гүйцэтгэх засаглал хоорондын хяналт, хариуцлагын тогтолцоог сайжруулахын тулд УИХ-ын гишүүн, Засгийн газрын гишүүний албан тушаалыг нэг хүнд давхардуулж хашиж болохгүй гэсэн зарчмын байр сууриа дахин нотолж, дээрх томилгоог дэмжихгүй гэдгээ үүгээр илэрхийлж байна. Иймд Монгол Улсын Засгийн газрын гишүүнийг шинээр томилох саналаа дахин зөвшилцөхийг хүсье” хэмээжээ.