УИХ-ын ээлжит бус чуулган өнөөдөр нээлтээ хийсэнтэй холбогдуулан ИЗНН-аас өнөөдөр УИХ-ын гишүүдэд Өршөөлийн үзүүлэх тухай хуульд Ерөнхийлөгчийн хэсэгчлэн тавьсан хоригийг хүлээж авахыг хүсч, бичиг хүргүүлжээ.
Тус бичигт, “Гэр бүлийн хүчирхийлэлд өртсөн эмэгтэйчүүд, санаатай бусаар гэмт хэрэг үйлдсэн иргэддээ өршөөл үзүүлэх нь энэрэнгүй төрийн ёсон тул дэмжих нь зүйн хэрэг. Харин эрх мэдэл, албан тушаалаа урвуулан ашиглаж ард түмний баялагаас хумсалсан авилгачдыг өршөөхийг бид хэрхэвч тэвчих ёсгүй. Монгол Улс дааж давшгүй их өрөнд баригдан, баян хоосны ялгаа туйлдаа хүрч, нийгмийн шударга ёс алдагдахад авлигачид, хээл хахуулчид гол үүрэг гүйцэтгэсэн юм.
Монгол Улсын Ерөнхийлөгчөөс Өршөөл үзүүлэх тухай хуулийн зарим заалтад тавьсан хоригийг хүлээн авч, авлигачдыг өөгшүүлэхгүй гэдгээ нотлон харуулах түүхэн боломж танд ирлээ. Монгол төр ард иргэддээ энэрэнгүй хандан, харин авлигачдад хатуу цээрлэл үзүүлсэн цагт шударга ёс мөн чанараа олно” гэжээ.
ИЗНН-ын Ерөнхий нарийн бичгийн дарга Б.Хүдэр-Ян, “Ерөнхийлөгч Өршөөл үзүүлэх тухай хуульд хэсэгчлэн хориг тавьсантай холбогдуулан манай намаас “Авлига, албан тушаалын гэмт хэрэгтнүүдийг өршөөхийг эсэргүүцэж байна уу” гэсэн ард нийтийн санал асуулга явуулсан. Уг санал асуулгад 5000 иргэн оролцсон. Санал асуулгад оролцсон иргэд 100 хувь авлига, албан тушаалын гэмт хэргийг өршөөхийг эсэргүүцсэн. Тиймээс иргэдийн саналыг Ерөнхийлөгчийн хоригийг хүлээж авахыг хүссэн бичигийн хамт гишүүдэд хүргүүлж байна. Хэрэв Ерөнхийлөгчийн хоригийг хүлээж аваагүй тохиолдолд бид авлига, албан тушаалтны хэргийг өршөөхийн эсрэг бүхий л боломжтой хувилбараар тэмцэх болно” гэв.
