УИХ-ын байнгын хороод өнөөдөр хуралдаж сайдад нэр дэвшигчдийг томилох эсэх асуудлыг хэлэлцсэн.

Тухайлбал, Төсвийн байнгын хорооны хуралдаанаар УИХ-ын гишүүн Б.Болорыг Сангийн сайдаар томилох эсэх асуудлыг хэлэлцлээ. Байнгын хорооны гишүүдийн 100 хувийн саналаар түүнийг Сангийн сайдад томилохыг дэмжив.

Хэлэлцэж буй асуудалтай холбогдуулан асуулт асуух гэсэн байсангүй. Харин УИХ-ын гишүүн Ч.Улаан Улсын төсвийн байдал хүндхэн байгаа учраас зарлагаа зөв тооцоолж анхааралтай сайн ажиллахыг хүслээ.

УИХ-ын гишүүн Б.Болор нь 1997 онд Бельгийн вант улсын Европын Их сургууль,  2012 онд ШУТИС-ийг төгссөн, эдийн засагч мэргэжилтэй юм байна.  Ажлын гараагаа 1997-2000 онд Төрийн өмчит “НИК” компаний гадаад харилцааны мэргэжилтнээр эхэлж, 2001-2006 онд “Гарьд Тур” ХХКомпаний ерөнхий захирал, 2006-2008 онд “Тиара Монголиа” төслийн удирдагч, 2008-2012 онд Монгол Улсын Гадаад харилцааны дэд сайдаар ажилласан байна.

2012 оны УИХ-ын сонгуульд Архангай аймагт нэр дэвшин өрсөлдөж, УИХ-ын гишүүнээр  сонгогдсон.  2014 оны арванхоёрдугаар сараас УИХ-ын Төсвийн байнгын хорооны даргаар сонгогдон ажиллаж байгаа юм.

Хөдөлмөрийн сайдад нэр дэвшигч Г.Баярсайханыг томилохыг дэмжив

Ниймгийн бодлого, болосврол соёл, шинжлэх ухааны байнгын хорооны хуралдаан мөн болж өндөрлөсөн. 

Тус байнгын хороогоор Засгийн газрын гишүүн буюу Хөдөлмөрийн сайдад нэр дэвшигч УИХ-ын гишүүн Г.Баярсайханыг томилох эсэхийг хэлэлцэн шийдвэрлэв.

Монгол Улсын Засгийн газрын гишүүн Хөдөлмөрийн сайдад нэр дэвшигч Г.Баярсайханыг томилохыг байнгын хорооны хуралд оролцсон гишүүдийн олонхи дэмжлээ. 

З.Баянсэлэнгэ, М.Зоригт нарыг дэмжив

УИХ-ын Эдийн засгийн байнгын хорооны өнөөдрийн хуралдаанаар Засгийн газрын гишүүнийг томилох тухай асуудлыг хэлэлцлээ.

Хуралдаанаар Зам тээврийн сайдад М.Зоригтыг, Барилга, хот байгуулалтын сайдад З.Баянсэлэнгийг томилох тухай асуудлыг хэлэлцсэн юм.

Хуралдаанд оролцогчдын 70 хувийн саналаар Барилга хот байгуулалтын сайдад нэр дэвшигч З.Баянсэлэнгэ, Зам тээврийн сайдад нэр дэвшигч М.Зоригтыг 60 хувийн саналаар дэмжиж УИХ-аар хэлэлцэхээр боллоо.