УИХ-ын чуулганы хуралдаанаар Засгийн газрын зарим  сайд нарыг томилох асуудлыг хэлэлцэж байна. Хуралдаанаар дөнгөж сая УИХ-ын гишүүн З.Баянсэлэнгийг Барилга, хот байгуулалтын яамны сайдад томиллоо.

Түүнийг хуралдаанд оролцсон нийт гишүүдийн 93.2 хувь нь дэмжив. Одоогийн байдлаар УИХ-ын гишүүн Ц.Оюунбаатарыг Шадар сайдаар, Б.Болорыг Сангийн сайдаар, Н.Батцэрэгийг БОНХАЖ-ын сайдаар тус, тус томилоод байна. 

Түүнийг томилох эсэхийг хэлэлцэж үеэр УИХ-ын гишүүн Ц.Дашдорж "Барилга хот байгуулалт бол улсын хөгжлийг харуулах гол салбар. Өнөөгийн барилгын стандарт, норм, дүрмийг нарийн судалж барилга дээр үйлдвэрлэлийн осол гэмтэл гарах, иргэдэд чанаргүй барилга нийлүүлэхээс сэргийлэх хэрэгтэй. Түүнчлэн Төв цэвэрлэх байгууламжийн хүчин чадлыг сайжруулах, газрын наймааг бууруулахад анхаарлаа хандуулах ёстой" гэв.

УИХ-ын гишүүн Л.Эрдэнчимэг "З.Баянсэлэнгэ гишүүнийг мэргэжлийн хүн биш гэх шүүмжлэл их гарч байна. Сүүлийн 8 жилийн хугацаанд мэргэжлийн сайд төдийлөн томилогдоогүй. Яам гэдэг бол тухайн салбарын мэргэшсэн менежер гэж болно. Харин сайд бол мэргэжлийн яамыг удирдах ёстой улс төрийн албан тушаалтан юм. З.Баянсэлэнгэ гишүүнийг сайдаар томилохыг дэмжиж байна. Амжилт хүсье" гэлээ.

Т.Энхэлээ